“Vengo a l'aventura”, confiesa la castropolense Alicia González de camín al apeaderu del tren de Tol (Castropol), onde se va xubir a un serviciu de Renfe (antigua Feve) con destín Uviéu, el so llugar de residencia habitual. Nel meyor de los casos va tardar casi cuatro hores (la salida ta afitada pa les 19.05 y la llegada pa les 22.55) en facer un percorríu qu'en coche lleva menos d'hora y media. Sicasí, cunta esta usuaria, ye raru'l día en que se cumplen los tiempos: averíes, retrasos y cancelaciones son habituales nun serviciu “que tán dexando morrer”.
Como exemplu, l'aventura de l'últimu domingu, cuando LA NUEVA ESPAÑA acompañola nel so viaxe pa cuntar lo complexo que ye movese en serviciu públicu de tresporte pel Noroccidente. El tren tien de pasar per Tol –un apeaderu ensin nengún tipu de serviciu y al que s'aporta cruciando un terrén de llabranza– a les 19.05, pero pasa media hora y nun hai nin rastru. González nun gorguta, porque ta a avezada a les esperes. Ensin dir más allá, el vienres anterior, col billete na mano y la confirmación espresa de qu'habría ruta, cancelaron el serviciu pola fuelga de Renfe, y el sábadu llogró viaxar pero con media hora de retrasu.
Sicasí, pasen los minutos y empieza a amusgase. “Esto yá nun me gusta”, señala. Contacta entós col serviciu d'atención al veceru de la empresa y confírmen-y lo que tarrecía: el serviciu entre Ribadeo (Lugo) y Cuideiru ta faciéndose n'autobús. Sicasí, el bus nun allega al aislláu apeaderu de Tol a comprobar si hai usuarios, asina que, pa nun lu facer dar la vuelta, Renfe decide contratar un taxi pa dir en busca d'Alicia. Llega a Cuideiru primero que l'autobús, nel que viaxen cinco persones. A la fin, el tren llega a Uviéu a les once, con cinco minutos de retrasu y depués de cuatro hores d'auténtica aventura.
Cada vez que vien a so casa, nel Occidente, pasa ocho hores nel vagón de tren (ente ida y vuelta) y casi siempre con dalguna anécdota que cuntar. “Nun sé cómo pretenden afitar población con estos servicios de tresporte públicu. En tren, por exemplu, nun ye posible dir y volver nel día a Uviéu. Cuénto-yoslo a los mios amigos d'Uviéu y nun lo creen. Ye que tardo lo mesmo en dir a Castropol qu'a Madrid”, llamenta esta muyer, que defende'l tren como un serviciu afayaízu y económicu (d'Uviéu a Tol cuésta-y 10,80 euros).
Tien claro que, si nun se programen horarios más comerciales y nun s'invierte n'ameyorar la maquinaria, nun va ser posible la supervivencia del serviciu. “Veo desorganización y poca visión. Un desdexamientu grande per parte de toos. Esto ta fecho, namás lo hai que caltener y nun lo dexar morrer”, llamenta Alicia González.
Na llista de problemes nun figuren solo los retrasos y les averíes, sinón tamién la falta de control de los usuarios. Por poner un exemplu, una persona que se monta nel tren de tarde en Tol puede perfectamente facer el viaxe ensin pagar un duru y, lo peor, ensin que quede constancia del so pasu pel tren. Nos apeaderos nun hai máquines que despachen billetes, nin nengún tipu d'información más allá d'un cartelu colos horarios. Si nun apaez un supervisor, daqué que nun asocede en tolos viaxes, nun hai a quien pagar el billete o a quien cuntar cualquier incidencia. Esperes a ciegues, ensin saber si daqué va mal na ruta. “Dacuando nun hai nin megafonía dientro”, añede esta usuaria.
La protagonista d'esta hestoria empezó a viaxar en tren fai relativamente poco, porque hasta la pandemia avezaba movese n'autobús. Sicasí, farta de lluchar pola meyora del serviciu, camudó de mediu de tresporte. Dolió-y especialmente que se suprimiera la llínea “exprés” estrenada en 2019 pa les fines de selmana y qu'encurtiaba'l viaxe a Uviéu en 40 minutos al percorrer ensin paraes el trayectu de Navia a la capital. Una de les sos compañeres de fatiga na llucha por un meyor serviciu d'autobús ye una tapiega que prefier nun dar el so nome, pero sí cunta cómo ye'l periplu n'Alsa (la empresa que xestiona'l serviciu) pola mariña. “L'autobús funciona bien no referente a horarios, pero ye un auténticu percorríu turísticu, tien demasiaes paraes”, llamenta.
Esta muyer cubre la distancia ente Uviéu y A Caridá con bastante frecuencia y diz qu'últimamente tárdase ente dos hores y media y tres en facer esti viaxe d'hora y cuartu en coche. “Con estes rutes con tantes paraes la xente ta dexando de viaxar. Casi nun ye vidable usar l'autobús pa dir al médicu a Uviéu, asina qu'a esti ritmu acabará por sumir el serviciu de tresporte públicu nel Noroccidente. Tán acabando con él porque t'obliguen a dir en coche”, denuncia. Esta usuaria diz que la solución tien de pasar por amenorgar paraes, sobremanera en zones con otros servicios: “Que se xuba una persona n'Avilés y se pose en Raíces, a tres kilómetros, nun puede ser, porque ehí hai otros servicios”.
