La Conseyería d'Educación entamó esti sábadu 9 d'ochobre, la prueba de certificación de llingua asturiana na Facultá de Formación del Profesoráu y Educación. Esti exame, qu'empezó a celebrase l'añu pasáu col nivel intermediu (B2), estiéndese anguaño, pela primer vez, al nivel avanzáu (C1).

El llistáu de persones almitíes xube a 476, de les que 283 tán inscrites pa consiguir el B2 y les 193 restantes aspiren al C1.

Dambes pruebes consten de cinco partes: comprensión de testos escritos, compresión de testos orales, producción y coproducción de testos escritos, producción y coproducción de testos orales y mediación. Pa llograr el certificáu va ser necesario aprobar caúna de les partes y llograr un promediu de seis.

La Conseyería constituyó trés tribunales pa la evaluación, que tán integraos por profesoráu funcionariu de carrera del cuerpu de profesores de Secundaria y llingüistes espertos en llingua asturiana.

Amás, la Dirección Xeneral d'Ordenación, Evaluación y Equidá Educativa publicó nel portal web Educastur un documentu qu'inclúi orientaciones sobre la prueba.

La convocatoria tien el so propiu protocolu de midíes hixénico-sanitaries, visáu pola Conseyería de Salú y pola Universidá d'Uviéu. Pa cumplir con tolos requisitos de seguridá, la entrada va ser graduada. A cada participante unvióse-y un mensaxe SMS asignándo-y una hora d'accesu.

Les pruebes surden de la collaboración ente les conseyeríes d'Educación y Cultura. El decretu 47/2019 de 21 de xunu, pol que s'establecen los niveles de competencia del usu de la llingua asturiana y que regula esta prueba de certificación, diseñólu la Dirección de Política Llingüística de Cultura. Educación encargóse de la convocatoria, la inscripción, la organización y l'aplicación de los exámenes y va ser tamién la encargada d'espedir los certificaos. Los niveles tán adaptaos al Marcu Común de Referencia Européu (MCRE) de les Llingües.

Estos exámenes de certificación de llingua asturiana miden el grau de dominiu nel usu. Les persones aspirantes van ser evaluaes tomando como referencia los oxetivos, les competencies, los conteníos y los criterios d'evaluación establecíos nel decretu, según informa EUROPA PRESS.