“Lucas” intenta quitar el bozal nel so paséu pel Fontán, n'Uviéu. Ye un perru pitbull y la so raza ta considerada potencialmente peligrosa, una clasificación que va sumir cola nueva llei de Protección y Derechos de los Animales que pretende aprobar el Gobiernu y que'l pasáu miércoles abrió'l so plazu d'información pública. Carmen Madera nun ye la so dueña, pero lleva a “Lucas” de paséu. La rapaza aplaude la nueva llei y esplica que “la peligrosidá nun la tienen los perros, tiénenla los dueños”. Ye consciente de qu'animales como “Lucas” “pueden tener una taragañada más potente”, pero eso íguase con educación, con esi cursu que'l Gobiernu quier que faigan tolos dueños de mascotes pa facilitar una “tenencia responsable del animal”. Por aciu d'esta formación preténdese que'l propietariu desenvuelva unes conocencies básiques “nel manexu, curiáu y tenencia d'animales”. 

A Raquel Limas lo del cursu nun la pilla de nueves, vive en Suiza y yá lu tuvo que facer pa ser dueña de “Arcani”, un llobu spitz de siete años y mediu qu'esti día decidió que nun quería caminar muncho y prefirió que lu sacaren nel so carrín. Limas ta encantada de que n'España se siga'l mesmu camín que nel so país de residencia, pero pide “que dexen entrar a los perros en tolos restoranes porque agora son mui poquiñinos los que nos lo permiten”. La llei va per esi camín, yá que destaca que los establecimientos públicos y privaos “como agospiamientos hoteleros, sableres, restoranes o chigres” que nun dexen la entrada y estancia d'animales tendrán d'amosalo por aciu d'un indicativu “visible dende l'esterior” que lo avise. Pero, perriba de too, lo que quier Limas ye “que nun se maltrate a los animales” y que s'empiece a considerar a les mascotes seres con sentimientos.

Carmen Madera y “Lucas”. | M. L.

Carmen Madera y “Lucas”. | M. L.

La nueva llei va prohibir tamién qu'un perru quede solo en casa más de 24 hores porque puede supone-y un sufrimientu. “Buster” nun podría, “acabaría con tou”, bromia la so dueña, Raquel López. La moza ye de Los Campos (Corvera), pero adoptó a la so mascota nel albergue d'animales d'Uviéu, en La Bolgachina; por eso Raquel López allégrase de que'l proyectu de llei de Protección y Derechos de los Animales incluya la prohibición de vender animales en tiendes. “Ye lo meyor que pueden facer, esaniciar les vientes”, asegura, y arguméntalo: “Vi perres ataes de mui mala manera y los sos dueños pa lo único que les quieren ye pa criar y vender; depués, cuando yá nun valen, abandónenles na carretera”

Pa casos de maltratu, la nueva llei inclúi un nuevu apartáu de sanciones, que pueden ser de tres tipos distintos: leves, graves y pergraves. 

Nel casu de les infracciones leves, les multes van andar ente 600 y 30.000 euros; nes graves, ente 30.001 y 100.000 euros, y nes pergraves, 100.001 y 600.000 euros. 

Amás, disponse como sanción accesoria la posibilidá d'inhabilitar al propietariu pa la tenencia d'animales “por un periodu máximu de cinco años pa les infracciones graves y de cinco a diez años pa les pergraves”.