La Conseyería de Cultura, Política Llingüística y Turismu del Gobiernu asturianu va entamar la gala y va producir el discu colos cantares ganadores del concursu escolar 'Al son del cantar', entamáu pola Rede de Normalización Llingüística y con unes bases que puen consultase na web Educastur.

Esti proyectu d'innovación educativa ta dirixíu a los centros d'Avilés, Candamu, Cangas, Castrillón, Corvera, Grau, Samartín del Rei Aurelio, L.lena, Xixón y a los conceyos de les mancomunidaes de la Comarca de la Sidra, Ozcos-Eo, Cabu Peñes y Parque Históricu del Navia.

Según informó'l Gobiernu asturianu, la iniciativa consiste nun concursu musical pa los cursos de 4u, 5u y 6u de Primaria y 1u y 2u de la ESO, que pretende afalar l'aprendizaxe al traviés de la investigación, el descubrimientu y la creatividá nel campu de la música.

L'oxetivu ye que l'alumnáu escriba la lletra d'un cantar n'asturianu o gallego-asturianu sobre una melodía tradicional o una composición propia. Un xuráu va escoyer los cantares ganadores, que van ser versionaos por grupos profesionales de la música asturiana.

Esti concursu, que yá se celebró nuna edición anterior col títulu 'El mio cantar', camuda agora la so denominación pa facela "inclusiva" a la zona del gallego-asturianu, según esplicaron dende Cultura. El resultáu d'aquella primer edición foi un discu que se distribuyó pelos centros educativos del Principáu y que ta accesible nes plataformes Youtube y Spotify, según informa EUROPA PRESS.