Cangues d'Onís da calabaces. Y de les bones. Les de la localidá canguesa de Ñarciandi nun pasen desapercibíes pa naide pol so gran tamañu.
La güerta de Pablo Martínez Suero tien visto crecer esti añu dellos exemplares de más de 30 kilos caún. Y nun ye la primer vegada qu'asocede. Porque los cultivos de distintes variedaes que llanta na so tierra dieron frutos espectaculares, como unos calabacinos qu'algamaron los 35 kilos.
Hai tamién daqué que nestos años ablucó a Pablo y a la so familia: el tamañu d'unes cebolles que llegaron a pesar casi 1,5 kilogramos.
De primeres, les calabaces usábales la familia pa facer morcielles. Pero primero de la pandemia yá les empezaron a pidir pa la decoración de la fiesta de Halloween.
A Pablo Martínez ayúdenlu a caltener la güerta los sos padres Francisco y Manolita. Y la espectacular producción d'esta tierra guárdase en documentos gráficos qu'atestigüen les dimensiones de los productos que llograron otros años. Francisco Martínez, el padre de Pablo, recuerda que llegaron a tener un xirasol qu'algamó los 3,30 metros d'altu. “Yera del anchor de la puerta de la casa”, diz el cangués. Les propiedaes del suelu y el tipu d'abonu paecen ser le causes de crecedera tala nes verdures, hortolexes y plantes que cultiva la familia canguesa.
“Delles calabaces tenemos que garrales ente'l mio padre y yo porque una persona sola nun puede”, diz Pablo Martínez, avezáu a trabayar con productos de gran tamañu colos que lu sigue sorprendiendo'l campu.
