La idea surdió d'una conversación que caltuvo con un párrocu “bien conocíu” que-y esplicó “cómo la Virxe ayudara a ganar la guerra lluchando contra'l comunismu”. Nesi momentu, Jota García, un diseñador y dibuxante uvieín de 32 años, tuvo una visión: la imaxe d'una Virxe guerrillera qu'acaba de facese realidá nel cómic “Pequeña y galana”, protagonizáu por una muyer “texturizada” como la Santina, una “hestoria anacrónica y de ficción” y que'l so argumentu ye, según se llee na contraportada, el siguiente: “Cuadonga ye una madre frustrada que tien qu'anteponer el so trabayu como sicaria de Dios, enantes de cumplir el so suañu de ser madre. La Ilesia tien d'anubrir el so embarazu, frutu d'un alcuentru románticu col caballeru Pelayo. Esti contratiempu, llamáu Favila, tendrá de resolvese, yá que sería una torga pa la creación del armamentu devotu que se taba entamando. Un viaxe macarra, anacrónicu y mui selvaxe, apináu d'irreverencia y munchu anticlericalismu”. 

Jota García asoleyó'l so nuevu cómic en redes sociales el pasáu 8 de setiembre, coincidiendo col Día d'Asturies. Y ta “flipando” pola cantidá de pidíos que ta recibiendo. “Nun esperaba que trescendiera tanto”, añede esti ceador que s'educó nun colexu de monxes d'Uviéu y al que, de neñu, cuando se portaba mal, so madre avisábalu: “Vamos metete internu na Escolanía de Cuadonga”. Como ufierta de llanzamientu, Jota tien impreso una parodia de la yá llexendaria pegatina covadonguista que llucíen cientos de coches n'Asturies. Solo que nesta ocasión camudó la lleenda: “Yo conduzo, ella dispara”. El cómic comprase online, al traviés de la so editorial (Unbrained Comics) y tamién en tiendes especializaes. Jota ye perfectamente consciente de qu'optó por una tema polémicu. Ello ye que yá recibió reacciones negatives en Twitter: “El comentariu que me facíen toos tenía un denominador común: a ver si m'atrevía a facer lo mesmo con Mahoma”. Tamién-y echaron en cara qu'hubiera “hipersexualizao” a la protagonista, dándo-y una imaxe descomanadamente neumática a la so Cuadonga, asemeyándola a una heroína tarantiniana de película de serie B. Jota buscó esa imaxe “por da-y esi rollu guerrilleru, un clixé cinematográficu, lo totalmente opuesto a la realidá”. Y asina creó a una muyer escultural y de gatillu fácil, armada con fusil d'asaltu y granaes de mano, emplegada nuna misteriosa organización llamada La Central, “qu'axunta toles relixones” y ta dirixida por un tal “Dios”. El diseñador y dibuxante afirma que, a lo postrero, el so cómic ye solo la “hestoria d'una madre que llucha pol so fíu”. Tamién almite qu'acabó “encariñándose” col personaxe. 

Jota insiste en que la so “Pequeña y galana” nun ye “una hestoria real, ye una hestoria de ficción inspirada n'otra hestoria de ficción”. Jota, quiciabes nun faiga falta esclarialo, nun ye n'absoluto relixosu: “El dogma nun me gusta” 

–¿Cree que “Pequeña y galana” puede resultar ofensivu? 

–La xente que merca estos cómics ta avezada a coses peores, pero si cai en manes d'una persona con sentimientos relixosos bien fondos sí puede sentise ofendida. Afítese lo que pasó apocayá con esi cartelu de Zahara (la cantante apaecía vistida como la Virxe, lo que provocó la protesta de Vox y la so retirada). Yá me fixeron chancies en relación a que l'asociación Abogaos Cristianos tien acutáu un sitiu para mi. 

–¿Esmolezlu? 

–Claro. Hai una cultura de la cancelación horrible. Lo políticamente correcto rínchame. Mio padre intentó encamentame pa que nun fixera'l cómic. Dicía que diben boicotiame, lapidame. Mio madre díxome: fai lo que quieras. Faigolo por soberanía personal. Pero que me presenten un pleitu yá nun me presta. Asústame. 

El cómic termina en “una especie de cantu del cisne, un ‘muerro matando’”, una escena que se desenvuelve nun supuestu búnker esistente na basílica de Cuadonga. Y, como epílogu, una carta que Cuadonga-y dirixe al so retueyu Favila: “Nun desperdicies la to vida, l'únicu mundu qu'esiste ye'l mundu terrenal y la vida nél contenida. (...) Vive la to propia vida; solo ti debes fidelidá a ti mesmu, xuega'l to propiu xuegu y sé el dueñu de la to llibertá. Quierte, mamá”.