El so güelu, asturianu natural de Morea, y la so güela, nacida en Roma, Italia, conociéronse y namoráronse per tierres de Llanes. La so madre nació en Mieres y tola so infancia dende bien neña y una vegada que la familia marchó a vivir a Madrid, son alcordances de los sos branos n'Asturies, nel conceyu llaniscu, del que yá dende entós namoróse Belén Álvarez Ceballos, artesana y residente cola so pareya nel pueblu de Cardosu.
Estudió Técnicu Superior en Salú Ambiental, pero nun pudo exercer la so carrera y mientres un tiempu trabayó como visitadora médica pa una industria farmacéutica. “Tuvi en delles multinacionales y cuando empecé de comercial pa una empresa de productos químicos tuvi una accidente que me camudó la vida”, señala l'artesana, que tuvo que dexar de trabayar y buscar alternatives pa invertir el so tiempu en daqué, como ella mesma esplica.
“Atopelo naquellos xuguetes que me gustaron dende neña. Yo yá venía ‘customizando’ (personalizando) los mios clicks como hobbie, pero cuando va tres años decidimos que queríemos venir vivir a Asturies, concretamente a Llanes, dime d'alta como artesana y dediqué profesionalmente a ello. El cambéu de residencia y esta actividá fueron un enorme incentivu pa mi”, señala na casa na que viven en Cardosu, depués de tar d'arriendu dos años en Niembru. “Daquella costónos enforma atopar un arriendu nel mediu rural, pero agora yá tenemos la nuesa casa”.
La capacidá creativa de Belén sorprende cuando amuesa, mesmo nos mercaos a los qu'allega como nes sos páxines en redes sociales los sos distintos moñecos, que robla col nome de “Imaginacliks7”.
“Yo lo que faigo son figures ‘customizaes’ y colos sos principales detalles pintaos a mano. Conózselos popularmente como clicks. Per un sitiu, faigo figures pa mi, les qu'a mi me gusten, y viéndoles en mercaos, feries y páxines de coleicionismu, y depués tamién en tiendes. Equí, na llibrería de Posada, por exemplu, pueden vese. Faigo tou tipu de personaxes de cualquier dómina, inclusive representaciones completes de, por casu, conflictos bélicos de recién, personaxes históricos, oficios y tamién por encargu de persones que m'unvien les sos semeyes pa tener el so propiu click. Tamién faigo cuadros con figures ‘customizaes’”, esplica esta artesana xuguetera.
Eso sí, una vegada fechos, son pa esposición y non pa xugar, pos, anque tienen movilidá, en dellos casos, como, por casu, la reproducción de la pareya d'aldeana y porruanu, hai una parte que lleva una resina que puede desapegase o estropiar si se mueve muncho.
L'ésitu de los sos clicks customizados trescala fronteres y amás d'Asturies y el restu d'España tamién llegó a países europeos. Esta artesana, que ye, amás, presidenta d'Asepo (Asociación d'Empresarios de Posada), cree firmemente que puede vivise y trabayar nel mediu rural.
“Yo, ensin moveme d'equí, puedo vender a cualesquier parte del mundu al tener una bona conexón a internet. Per otru llau, y a nivel xeneral, creo que ye un erru querer vivir solo dos meses del turismu. Tenemos que trabayar axuntaos pa llograr mesmo incentivos pa los que vivimos equí –por casu, cursos formativos que nos serán útiles– como actividaes qu'atraigan a la xente tou l'añu entamando mercaos temáticos, degustaciones gastronómiques, festivales folclóricos... Esti postreru esperamos facelu'l 20 de payares”, destaca.
