Recordó esti día la capital de Tinéu cómo recibió'l 4 d'ochobre de 1820 al so vecín, el militar y políticu Rafael del Riego y Flórez (Tuña, 1784- Madrid, 1823), na so visita a la so Asturies natal, tres el so famosu pronunciamientu contra la monarquía absoluta de Fernando VII en Las Cabezas de San Juan (Sevilla). Foi'l primer militar golpista de la hestoria moderna d'España.
Marcaba'l reló les doce y media del mediudía cuando'l militar baxó del so caballu, foi recibíu pol alcalde y, na mesma plaza del pueblu, pronunció'l so discursu. “A favor de la llibertá, de les llibertaes de toles partes porque la llibertá ye de toos”, contó'l so recreador, el politólogu, miembru de l'Asociación de Recreación Histórica Cultural d'Asturies y vecín de Santiáu, Pedro Villanueva.
Na villa siguiéronlu un bon númberu de persones que nun duldaron en glayar “¡Viva Riego!” al pasu de la güei querida figura na so Tuña natal. “Hai que conocer el pasáu pa caminar pel presente y proxectar el futuru”, dixo l'actor que dio vida a Rafael del Riego, quien desmitificó la figura del xeneral como “solo republicanu”. “Hai muncho qu'estudiar inda güei sobre'l personaxe, porque yera defensor de les llibertaes y contrariu al absolutismu del rei Fernando VII, pero non por ello menos monárquicu”.
Alderiques hestóricos y opiniones al marxe, esti día pudieron escuchase en Tinéu les mesmes palabres que se pronunciaron fai más de dos sieglos. “Amaos conciudadanos: anque educáu na servidume d'un gobiernu despóticu, el mio corazón vio con horror les cadenes que primíen a la nuesa madre patria; yo enllené d'espantu al ver a tantos homes llibres por naturaleza, dotaos de fuerza y valor vencer al xugu que-y imponía otru home que solo pol consentimientu de los demás podía caltenese nel altu puestu qu'ocupaba”, rezó'l discursu nel so entamu. “Yo allégrome por contribuyir a la vuesa llibertá y doivos les más espresives gracies polos afalagos que tenéis a bien espachame y los cualos pertenecen más bien a los mios beneméritos compañeros d'armes, que son los que derrocaron la tiranía”, siguió.
Formaron más tarde tropes, nun de los movimientos teatrales más siguíos y aplaudíos, y el xeneral pudo disfrutar del baille con un grupu de muyeres tinetines. Cuenta la lleenda, “daqué que ye más hestoria social que nada”, dixo Pedro Villanueva, qu'el “apuestu” xeneral bailló coles muyeres ellí arrexuntaes, na plaza de Tinéu, y fíxolo con ilusión. Foi ún de los momentos más animaos de la interpretación. Nun faltaron tampoco en Tinéu, coses yá de l'actualidá, les gaites coles que celebrar esta recreación entamada pol Conceyu de Tinéu y los móviles pa recordar tan pernomada visita.
Más tarde, na plaza de Las Campas desenvolviéronse otres escenes. Ellí onde Rafael del Riego reconoció la entrega del militar de Deigüeñu (Cangas del Narcea) Pedro del Tronco. El soldáu que s'apuntó voluntariu na Guerra de la Independencia y morrió fusiláu nesa mesma plaza en 1809. El conceyal de Cultura, Marcos da Rocha, quien interpretó al Alcalde de 1820, agradeció la participación y el públicu, y anunció sorpreses y más conteníu pa la próxima edición de la visita, yá n'ochobre de 2022.
