La nueva serie de superhéroes que Netflix va asoleyar a principios de 2022 tien sellu asturianu. Los hermanos Luis Pelayo y Enol Junquera Álvarez, al frente del estudiu d'animación xixonés Angry Metal, dirixeron y producieron “Los Guardianes de la Xusticia” (The Guardians of Justice), xunto al famosu productor Adi Shankar y el so equipu de Bootleg Universe. Ye una sátira de superhéroes con tonu de cine negru qu'entemez munchos estilos y que foi nominada a la “Palma d'Oru” nel Festival de Cannes. “Ye un montaxe frenéticu ya imaxinativu: nun minutu ves imaxe real, animación, efectos especiales, pixel art...”, cuenta Enol Junquera, que ye profesor del departamentu d'Informática de la Universidá d'Uviéu. Los hermanos xixoneses creen que tán delantre del trabayu que más puertes internacionales puede abri-yos. “A cabu Netflix vemoslu toos. Cualquier persona del mundu va poder ver la nuesa serie y non solo eso: según enciendan la televisión, va apaecé-yos”, afirmen. 

Los xixoneses montaron la so propia empresa en 2014 y, de magar, nun apararon de crecer. El reconocíu productor Adi Shankar fichólos nos sos entamos pa desenvolver una serie d'animación basada nel famosu cómic británicu “Judge Dredd” y la relación profesional sigue hasta güei. “La producción foi perllarga, d'unos seis años. Nós, nun principiu, díbamos participar solo nun episodiu aislláu d'animación, pero tiempu dempués decidió camudar el tonu y l'estilu de la serie, ampliando la parte d'animación, que nos encargaron a nós”, esplica Enol Junquera, de 31 años.

Una de les sos animaciones pa “Los Guardianes de la Xusticia”.

Una de les sos animaciones pa “Los Guardianes de la Xusticia”.

En concreto, el proyectu tien siete episodios, d'unos venti minutos caún, y los fragmentos d'animación, que son “constantes” ayuden “a espandir l'universu hasta llendes a les que la imaxe real nun consigue llegar”. Col aquello de que los hermanos asturianos non solo los crearon, sinón que tamién los dirixeron. Ello ye que son dos de los cinco directores de la serie. “Adi Shankar dábanos unes pautes básiques, pero nós teníamos llibertá pa decidir cómo contalo. Y eso ye perbono, porque nos tenémonos más narradores qu'animadores”, comenta Enol Junquera, qu'esta selmana viaxó hasta Francia xunto al so hermanu Luis p'asistir al Festival de Cannes. 

 “Los Guardianes de la Xusticia” tuvo nominada a la “Palma d'Oru” na categoría de serie, anque finalmente nun llevó'l premiu. Tampoco yera'l porgüeyu principal de los hermanos Junquera. “Nós yá tenemos garantizada la distribución con Netflix, asina que ye meyor que lleve'l galardón una serie que nun lu tenga. Pero yá namás tar ellí foi un premiu”, asegura'l profesor universitariu. El festival foi una oportunidá, añede, “pa falar con otros productores y facer que la nuesa empresa evolucione”. “Foi una esperiencia perbona”, confiesa.  

Anque l'estudiu xixonés Agry Metal ye'l meyor exemplu de que puede facese cine d'ésitu dende Asturies, los sos responsables reconocen que la distancia xeográfica con EE XX lléndalos. “Internet salva un poco esa dificultá, pero, a la fin, nun ye lo mesmo falar en persona que facer una videollamada. Si viviéramos en Los Ánxeles esa capacidá de conocer xente multiplicaríase”, espresen. Cannes fíxolos pensar na posibilidá d'abrir una sede precisamente en Los Ánxeles, la meca del cine, pa “caltener les relaciones y traer trabayu p'Asturies”. Porque –eso tiénenlo claro– “caltendríamos la producción d'animación na rexón”.

Otra de les sos animaciones pa “Los Guardianes de la Xusticia”.

Otra de les sos animaciones pa “Los Guardianes de la Xusticia”.

Xunto a los Junquera, nel estudiu xixonés trabayen una decena de persones, que tamién participaron nel proyectu de Netflix. Son David Martínez, de nome artísticu “Spundman”, Juanma Laguna, Laura Rabanal, Borja Sauras, Sergio Ábalo, Marcos Bango, Irene Mateos y Adriano Tuya, casi toos ellos talentu asturianu. ¿Y qué cuenta “Los Guardianes de la Xusticia”? Enol Junquera contesta poniendo como exemplu la película “¿Quién engañó a Roger Rabbit?” (1988). “Ye la investigación d'un asesinatu y los posibles culpables son los Looney Tunes o Mickey Mouse. Equí asocede daqué asemeyao, ye cine negru y los posibles criminales son superhéroes que toos conocemos. Trátase d'afayar quién ye'l culpable”, resume. 

Pel momento, el proyectu ta camentáu como una miniserie, col so entamu y la so final, pero esiste la posibilidá de que, si gusta, Netflix produza una segunda temporada. “Ye'l nuesu primer trabayu pa Netflix y el fechu solu de pasar el so corte calidable yá fai posible que fora nos vean como unos profesionales”, destaca Enol Junquera. 

Los hermanos estrenaron va unos díes n'Estaos Xuníos: “Creepshow”, una serie antolóxica de “terror y un poco fantástica” producida por Greg Nicotero, famosu pol so trabayu como director en “Walking Dead”. Nesti casu, los creadores xixoneses participaron na dirección y producción completa d'un episodiu, qu'en EE XX yá se puede ver na plataforma Shudder y n'España (entá ensin fecha) na canal Mega, d'Antena 3.