La nueva ponte ente México y España pasa per Asturies: en concretu, pol Muséu de la Emigración de Colombres (Ribadeva). Y traduzse nuna sala de la casona “Quinta Guadalupe” dedicada al Atenéu Español de México, entidá fundada en 1949 y qu'arrexunta el legáu de los españoles exiliaos al país norteamericanu por mor de la Guerra Civil. 

“Ye un testimoniu de la hermandá ente dos países xuníos pola hestoria y pol porvenir de lo que tenemos que facer xuntos”, destacó Jesús Javier Perea Cortijo, secretariu d'Estáu de Migraciones, quien allegó a un actu que, de dalguna manera, quería ser un pasu de páxina: l'adiós a los tiempos de pandemia y l'ingresu nuna nueva etapa de la Fundación Archivo d'Indianos marcada por una apertura al mundu al traviés de les redes sociales y el porgüeyu d'algamar los 20.000 visitantes añales. 

Paneles y vídeos esplicativos, semeyes, llibros, revistes, un retratu de Lázaro Cárdenes, el presidente de México (1934-40) qu'abrió les puertes del so país a los intelectuales, artistes y políticos que dexaron España tres la victoria de Franco... Esta ye una parte del conteníu del espaciu habilitáu nel palacete construyíu en 1906 pol emigrante Íñigo Noriega Laso.

Jesús Javier Perea, Ernesto Casanova y Delia Losa reparen nos paneles de la nueva sala.

Nel actu de presentación de la nueva sala, l'empresariu Francisco Rodríguez, presidente del patronatu de la Fundación, filó un discursu que xira alredor d'una cifra: “Hai 500 millones de persones nel mundu que falen español. Gustaríanos que Colombres fora'l símbolu de too eso, porque equí ta'l raigañu de tola hispanidá. Y creemos qu'eso ye posible”. 

L'empresariu asturmexicanu Antonio Suárez, presidente de l'Asociación d'Amigos del Archivu d'Indianos, destacó que l'Atenéu Español de México foi afaláu por un grupu d'españoles “que fueron una inyección de cultura” pal so país d'acoyida. “Esti acercamientu ye bien conveniente porque tamos en momentos de sumar. Esta ye la casa de tolos emigrantes españoles”, enfatizó Antonio Suárez. Y axuntó: “Llogremos consolidar económicamente'l muséu y agora queremos facer un proyectu fuerte d'espansión al traviés de les redes sociales”. Ernesto Casanova Caloto, presidente del Atenéu Español de México, sorrayó que “estrechar los venceyos ente España, México y otros países favorez un arriquecimientu cultural”.

Un gaiteru toca “Asturies patria quería” al términu de la presentación.

Sobre la xunta del patronatu de la Fundación, Francisco Rodríguez recalcó que “quedó conseñao que les cuentes tán n'orde, que los proyectos paguen la pena y que les esperances tán absolutamente abiertes”. Santiago González Romero, director xerente de la Fundación Archivo d'Indianos, esplicó que los númberos aprobaos recueyen un prepuesto pal añu 2022 que xube a 498.000 euros, lo qu'implica una medría d'unos 100.000 euros con relación al exerciciu en cursu. El patronatu alcordó entamar una presentación de la fundación na República Dominicana, institucionalizar Colombres como exa de la collaboración ente Asturies y Cantabria, y una midida d'apariencia más doméstica, pero bien significativa: construyir en Quinta Guadalupe un ascensor que pase per toles plantes de la casa y facilite l'accesibilidá de les persones con movilidá amenorgada

Al actu asistieron, ente otres autoridaes, la delegada del Gobiernu n'Asturies, Delia Losa; la presidenta del PP n'Asturies, Teresa Mallada, y el so antecesor Isidro Fernández Rozada; y la presidenta del Conseyu de Comunidaes Asturianes, María Antonia Fernández Felgueroso.