De diputáu pol Occidente a pediatra pol Occidente. O, más bien, pol Noroccidente, una y bones l'allandés Andrés Fernández, más conocíu por Andrés Ron, acaba d'aportar como médicu al Hospital Comarcal de Xarrio. Llega dempués de ser cuatro años diputáu de Podemos na Xunta Xeneral del Principáu (de 2016 a 2019), onde exerció como responsable en materia sanitario de la formación morada. El balance del so primer mes nel centru de cabecera de la Área Sanitaria I nun puede ser meyor: “Ta siendo una esperiencia mui satisfactoria”. 

N'estudiando la carrera n'Uviéu, ente 2012 y 2015 tuvo trabayando como residente nel Hospital Universitariu Central d'Asturies (HUCA), centru al que se volvió incorporar tres el so paréntesis na política. “Foi un luxu poder recuperar un añu nun espaciu docente valiosísimu como ye l'HUCA”, espón esti profesional, de 34 años. Aprovechó esti periodu de reciclaxe pa especializase n'Urxencies Pediátriques, faciendo rotaciones nel Hospital de Cruces, en Bilbao, y el Maternu Infantil Sant Joan de Déu, de Barcelona. 

Pel camín, el xefe de Pediatría de Xarrio, Constancio Loza, xubilóse y quedó vacante la so plaza, a la que s'incorporó l'exdiputáu. Nun escuende que, pola so especialidá n'Urxencies, la so meta ye tornar al HUCA, pero ta encantáu de pasar una temporada nun hospital pequeñu como Xarrio. Eso sí, avisa: “D'equí nun marcho hasta qu'entre otra persona por mi”. 

“Pa la xente mozo estos hospitales comarcales son superatractivos. Tienen muncha flexibilidá d'horarios, y eso déxate dedicar tiempu a estudiar y siguir formándote faciendo rotaciones con otros centros más grandes. Amás, faes munches coses, dende atender partos a consultes o urxencies. Son puestos mui versátiles”, añede, de la que destaca lo pervalible de tar solu delantre de los problemes, porque ye una esperiencia que dexa un gran aprendizaxe. “Nos centros pequeños tamién trabayes más en xunto con otres especialidaes colo qu'eso te permite aprender”, diz.

L'exdiputáu nun abandona'l so activismu políticu y pide facer la semeya al pie de la pancarta del colectivu “Todos somos Jarrio”, creáu pa reclamar meyores na sanidá del Noroccidente. “Ye un movimientu vital y determinante. Si la población se mueve y reacciona, a los xestores nun-yos queda otra. Creo que, anque Xarrio llegue a tar nuna situación perfecta, tien de siguir, porque ye la manera de que nun se duerman”, espón. Na área de Pediatría na que trabaya la situación ye bona, con tres pediatres a tiempu completu, ún más con un contratu de guardies y dos pediatres d'Atención Primaria que faen guardies. Sicasí, esplica que non tolos servicios tán na mesma situación y cree qu'hai necesidaes acucioses como cubrir les places vacantes de profesionales o anovar l'escáner. 

Pola información que va pescanciando de los sos collacios conclúi qu'hai “una parte significativa de la plantiya descontenta” y que, “en términos globales, ta entrampiándose l'atención y son munches les llistes d'espera que crecen”. 

De la so esperiencia como diputáu quéda-y un bon sabor de boca. Que Podemos llograra un diputáu pol Occidente foi tou un finxu pal so partíu y considera que, cola so xera diaria, mui pegáu al territoriu, motivó que más políticos s'animaren a tener más presencia nos conceyos. “Sabíemos que yera posible llogralo, pero consiguir el diputáu foi pergratificante”, espón, satisfechu por dellos llogros qu'atribúi a la formación morada, como l'atención telemática al ictus. “Foi propuesta nuesa y güei ye realidá. Engarriamos en munchos frentes, como consiguir la UVI móvil del Noroccidente. Sigue pendiente la del Suroccidente, pero vamos siguir puxando por que la haya”, añede. Anque dexó oficialmente la política, sigue siendo combativu y ve necesidaes como ameyorar la política de personal, ufiertando más puestos na plantiya estructural de los centros hospitalarios.

“Normalizar la fala”

D'esos cuatro años en primer llínea política lleva aprendizaxes como saber bien por qué calces se resuelven los problemes. Tamién amplió les sos conocencies llingüístiques y, amás del asturianu occidental, que falaba pol so orixe allandés, anició nel gallego-asturianu, qu'agora usa nes sos consultes. “A los mios pacientes chóca-yos que-yos fále en "fala" y dempués siéntense supercómodos. Creo que ye perpositivo poder dar a la xente l'atención na so llingua más cercana, pos tien una repercusión mui positiva na relación médicu-paciente y ayuda a qu'entiendan meyor les indicaciones de salú”, diz Ron, defensor de la oficialidá. “Nel buque insignia de l'Alministración pública nel Noroccidente, l'Hospital de Xarrio, tien de normalizase que se fale'l gallego-asturianu”, apunta. Quier plantegar a la xerencia que se faiga una encuesta de satisfacción de los pacientes sobre l'usu de la llingua. Nun ye la única idea que tien: xunto a otra colega, quier proponer l'establecimientu d'un protocolu de sedoanalxesia intravenosa pa la reducción de les frañidures.