El Muséu del Pueblu d'Asturies recibió una nueva colección fotográfica, nesti casu de 4.380 fotografíes arrexuntaes mientres años pol historiador de Pravia José Antonio Martínez González, y qu'amuesen principalmente escenes, families, fiestes y trabayos del conceyu de Pravia, mesmo que de la redolada de la desembocadura del Nalón.

Les fotografíes de la colección tomen dende 1860 a 1975 y los sos autores son fotógrafos locales de Pravia, Malleza y Muros, y otros munchos d'Avilés, Uviéu, Xixón, Cangas, Trubia, Llugo, etc., lo mesmo que de Cuba y Arxentina. Na colección hai un daguerrotipu y un ambrotipu, dos de los procedimientos primixenios de la fotografía.

Según describen dende'l Muséu, hai imaxes de la villa de Pravia, mercaos y comercios, actividaes rurales, celebraciones sociales, relixoses y polítiques, teatru y banda de música, les fiestes, el ferrocarril, el puertu de San Esteban, el ríu Nalón, la escuela y los colexos pravianos (Colexu de San Luis, Santu Ángel, escueles nacionales), deportes, asociaciones, etc., mesmo tamién munchos retratos. Tamién hai permunches fotografíes unviaes por emigrantes n'América.

"Ye un conxuntu d'imaxes que son testigos de la vida entera d'un conceyu, que ye la vida entera d'Asturies a lo llargo de más d'un sieglu", espliquen los espertos del centru cultural xixonés.

"N'Asturies, hasta qu'empezó a funcionar la fototeca del Muséu del Pueblu d'Asturies, el caltenimientu y espardimientu del patrimoniu fotográficu foi una xera de persones como José Antonio Martínez, que coleccionaben y publicaben fotografíes de los sos conceyos. Gracies a esti llabor esisten pervalibles fontes pal estudiu de la hestoria de la fotografía en Llanes, Cangas, Villaviciosa, Mieres, Tapia, L.luarca, Candás, Llangréu o Cuideiru", añeden.

La incorporación de la colección de José Antonio Martínez al Muséu del Pueblu d'Asturies va sirvir "pa perpetuar el so esfuerzu y la so memoria, calteniendo les fotografíes qu'él arrexuntó". Informen dende'l Muséu que nestos momentos una gran parte de la so colección yá ta dixitalizada y ta entamando la so catalogación, y nos próximos meses va poder consultase nel repositoriu de les colecciones de los museos municipales del Conceyu de Xixón: fondos. gijon.es.

Quién yera'l coleccionista

José Antonio Martínez (Pravia, 1938-2009) yera llicenciáu en Derechu pola Universidá d'Uviéu, pero exerció sobremanera d'apasionáu y entregáu historiador local. Escribió y publicó dellos llibros: Historia de la Colegiata de Pravia (1977), Apuntes para una historia de Pravia (2000), Anecdotario praviano (2001), Breve historia del Santuario de N. S. del Valle, Pravia (2002), Lecciones de cosas... de Pravia (2006), Pravia, ayer y hoy (2006), etc. La so filantropía llegaba al estremu de que'l destín de los beneficios de la vienta d'estes publicaciones yera la Residencia d'Ancianos de N. S. del Valle de Pravia.

La so afición poles fotografíes antigües de la zona empezó nos años setenta del pasáu sieglu, como un llabor más del so interés asturianista por conocer y documentar el pasáu del so conceyu natal. 

A partir de 1992 entamó, cola collaboración de Luis Solar García, la publicación d'una serie de llibros titulaos Fotos históricas de Pravia, qu'allegaron a diecisiete volumes; el postreru salió en 2009, añu del so fallecimientu. "Persona mui abierta y arrogante coles sos conocencies, y cola información y documentación qu'axuntara, foi un gran collaborador del Muséu del Pueblu d'Asturies, al que donó permunchos documentos", recuerden dende'l centru, qu'agradez descomanadamente a la familia del donante "la so avenencia por que la so colección de fotografíes pasara a un muséu de titularidá pública".