Asturies va afitar y desestacionalizar la so ufierta de vuelos mientres el periodu ivernizu. En concretu, ente'l 31 d'ochobre y el 26 de marzu, feches de la nueva temporada, tán programaes 3.276 operaciones regulares a 15 destinos directos -14 nacionales y 1 internacional-, y van ufiertase más de 550.000 places. El Principáu lideró la recuperación de pasaxeros nos aeropuertos de la cornisa cantábrica pel branu.
Dende'l Principáu podrá viaxase en 24 rutes regulares operaes por cinco aerollínees (Iberia, Air Europa, Vueling, Volotea y Binter) que van conectar Asturies con Madrid, Barcelona, Sevilla, Málaga, Valencia, Alicante, Murcia, Mallorca, Eivissa (Ibiza), Tenerife norte, Tenerife sur, Gran Canaria, Lanzarote, Fuerteventura y París-Orly.
Como novedá, Asturies recupera a partir d'esti miércoles 3 de payares el vuelu internacional a París-Orly, atayáu de resultes de la crisis sanitaria de la covid-19. Esta ruta, operada por Vueling n'aviones de 220 places, va tar disponible los miércoles y domingos, magar va cuntar con refuerzos especiales per avientu. En total, van ufiertase casi 20.000 places partíes en 90 vuelos de salida y llegada.
Tamién s'incorpora la conexón con Fuerteventura, que se convierte nel quintu destín canariu con conexón directa dende'l Principáu. Cola isla majorera va operar la compañía Volotea, que programó 18 vuelos ente avientu y xineru, con capacidá pa 1.900 places. Tamién va siguir a partir d'abril.
La conexón con Madrid va tener casi 170.000 places partíes nos más de 900 vuelos de salida y llegada que va operar Iberia. Pela so parte Vueling va ufiertar más de 110.000 places en 610 operaciones na ruta con Barcelona.
El Principáu va tener más de 83.000 places directes con Andalucía, al traviés de los 268 vuelos directos que Volotea y Vueling ponen a la vienta na ruta con Sevilla y los 248 enllaces programaos con Málaga. Cola Comunidad Valenciana y Murcia ufiértense más de 60.000 places partíes en 224 vuelos con Alicante, 158 con Valencia y 6 con Murcia.
La operativa colos 5 aeropuertos de les isles Canaries supera les 80.000 places a la vienta. Destaca la programación con Gran Canaria, que va tener 208 vuelos de salida y llegada con Asturies o Tenerife norte, con 170 vuelos a la vienta. Los enllaces con Mallorca y Eivissa (Ibiza) van suponer una ufierta de más de 35.000 places y 200 operaciones.
El viceconseyeru d'Infraestructures, Movilidá y Territoriu, Jorge García, sorraya que l'oxetivu de la cartelera de vuelos regulares de la temporada ye avanzar escontra la desestacionalización de destinos y frecuencies coles mires de consiguir una operativa estable ya ininterrumpida mientres tol añu, sofitada por campañes de comunicación y marketing de promoción d'Asturies nes rexones con conexón directa.
La Viceconsejería d'Infraestructures, Movilidá y Territoriu sigue trabayando pa recuperar ya impulsar la conectividá aérea internacional, a la espera del pronunciamientu del Tribunal Alministrativu Central de Recursos Contractuales sobre'l recursu interpuestu por Volotea a los pliegos pa la contratación del serviciu de promoción d'Asturies nes principales capitales europees. Esta llicitación supondría l'apertura de rutes directes con Londres, Bruxeles, Dusseldorf, Barcelona, Milán y Lisboa a partir de marzu de 2022.
