La celebración el domingu pasáu n'Onís del XLI Certame del quesu gamonéu, nes sos variedaes del puertu y del valle, volvió poner d'actualidá un quesu que tien cada añu nuevos ellaboradores na rexón, sobremanera nel casu de la categoría del valle. Asina lo conseña una veterana, Covadonga Fernández, de la quesería Gumartini, que s'alzó col primer premiu na categoría del puertu. Nun ye la primer vegada qu'esta quesera, qu'empezó a ellaborar con 22 años y lleva 42 años nel oficiu, ve reconocíu'l so trabayu. Apecuña cantidá tala de premios y reconocencies que-y resulta difícil contabilizalos toos.
“Los queseros del valle son bonos queseros, xente mozo con munches ganes de facer bien les coses, ye ciertu que cada vez hai más y, ensin dulda, naide sobra porque viéndese tou. Otra cosa ye'l puertu, y eso que nun ye como cuando yo yera rapaza, que yera muncho más duru qu'agora, cuando tenemos lluz, agua, catadores pa les vaques, anque oveyes y cabres síguen meciéndose a mano, pero la vida ellí sigue siendo difícil. Hai que nacer y criase nello p'afayase a esta vida. Nós tuvimos chavales aprendiendo a ser pastores y ellaborar gamonéu del puertu, por que nun s'acabe, pero equí naide se queda. Contando conmigo güei quedamos cuatro xunto con Uberdón, Enrique Remis y Vega La Fana”, recuerda.
Más de 7.000 euros pagó na puya del pasáu domingu César Suárez Junco, del grupu Tierra Astur Crivencar, pol so quesu y pol ellaboráu por Sergio Suero Crespo, de la quesería Vega Ceñal, que llevó'l primer premiu na categoría del valle, un dineru que se va destinar a los damnificados de la isla de la Palma.
Pa Suero, quinta xeneración de queseros, esti reconocimientu ye un emburrión al so trabayu, pol que siente auténtica pasión. “Nel valle somos munchos más queseros y creo que, polo xeneral, el nivel ye bonu; el gamonéu del valle ameyoró muncho de va seis años p'acá”, señala esti mozu qu'ellabora ente 8.500 y 9.000 quesos al añu con tamaños qu'anden ente pieces de dos kilos y mediu y siete.
Él, qu'amás tien vaques de carne, cree que “el quesu, siempre y cuando sía un productu calidable, puede llévate muncho trabayu y muncho tiempu y puede dexate un poquitín de marxe y de ganancia a base d'engardite muncho y curialo más. Otra cosa ye lo que pasa col quesu del puertu, porque viendo les decisiones que se tán tomando cola tema del llobu, los que tengan animales n'estensivu nel puertu tienen los díes contaos”, llaméntase esti queseru.
Tanto pa él como pa Covadonga Fernández la celebración n'Uviéu estos díes del International Cheese Festival va ser un gran escaparate pa los quesos asturianos. Ellí va tar, ente otros, nuna cuña d'un kilu, el quesu de Gumartini, de Cuadonga Fernández.
