La cumbre de Glasgow empezó, como otres precedentes, con testimonios y declaraciones que dieron volume a la emerxencia climática. António Guterres, secretariu xeneral de la ONU, faló en tonu directu y admonitoriu (“Yá tuvo bien de tratar a la naturaleza como un váter”), quiciabes cola alcordanza bien presente del fracasu del cume anterior (COP25, celebráu en Madrid en 2019): daquella, los negociadores nun fueron quien a algamar compromisos concretos y xeneralizaos p'acometer planes más ambiciosos de recorte d'emisiones de CO2, como imploren los científicos, o d'apautar la estensión y coordinación de los mercaos de carbonu como preseos aceleradores de la sustitución de combustibles fósiles por tecnoloxíes llimpies.
Delles coses importantes camudaron de magar, en particular la salida del republicanu-negacionista Donald Trump de la Casa Blanca y la llegada del demócrata-verde Joe Biden (anque esti día fíxose viral una imaxe d'elli apigazando na inauguración de COP26).
Les posiciones d'EE XX, China y otros grandes xeneradores de CO2 devaluaron los resultaos d'aquel cume chilenu-español –presidida por Chile, anque con sede en Madrid–, y en Glasgow van remanecer de xuru enzancos asemeyaos, esta vegada ensin la complicidá estadounidense. El grupu de resistencia va tar formáu por países como China, India, Australia y Rusia, contrarios a adelantar –na midida que demanden otros estaos y la ciencia– el final del usu del carbón, principal emisor de CO2 al traviés de la xeneración eléctrica y d'otros procesos industriales.
Un desenllaz creíble pa la COP26 antemanóse'l domingu 31 d'ochobre nel G20: los países citaos frenaron un intentu de declaración que comprometía a los miembros del grupu a abandonar l'usu eléctricu del carbón en 2030, un mandatu de difícil dixestión doméstica en China ya India, que les sos térmiques cubren casi dos terceres partes de los sos consumos, y n'Australia y Rusia, grandes productores y esportadores de mineral. Son los cuatro integrantes principales del frente carboneru de Glasgow.
