El Muséu de Porrúa (Llanes) ufierta dende'l xueves 11 de payares, una propuesta cultural que nun va dexar indiferente a naide. Lleva por títulu RCTA (Reinterpretación de la Cultura Tradicional Asturiana) y ye obra del artista Ricardo Villoria, que yá fixo una visita guiada pa inaugurar l'amuesa, que va permanecer abierta hasta'l 13 d'avientu.
Ta compuesta por fotografíes, vídeos y indumentaria tradicional presentada dende un puntu de vista distintu y chocante, pero qu'al empar s'integra de forma natural cola esposición permanente del muséu llaniscu.
Villoria ye diseñador gráficu y artista multidisciplinar y en Porrúa combina elementos d'esta amuesa colos de la so esposición anterior, de nome “Llabor”. D'esta postrera hai, por casu, elementos como'l “Gomín”, una cámara de rueda de tractor, o los “sábanos” pintaos con polvu de carbón.
El tresformamientu d'estilismos, la combinación con elementos chocantes como'l látex y la creación de nuevos diseños al traviés de patrones tradicionales y pedrería, terciopelu y pañu, ente otros materiales, xúntense nesta amuesa, na que'l negru impera nes fotografíes que protagonicen tamién la esposición o nos estilismos con ropa tradicional asturiana negra. Ente ellos, hai un corsé de terciopelu diseñáu pol autor en collaboración cola artesana de Cue Josefina Fernández.
La tonada, la matanza o paxellos de sieglos pasaos danse cita na esposición. Villoria entemez la tradición de les Cuenques, la qu'él vivió na so niñez y adolescencia, al empar que fai guiñaes a Llanes d'un xeitu qu'abulta que tou encaxa a la perfección. ”Nun tenemos que llindanos a representar lo tradicional talo cualo cuando puede haber otres víes”, esplica l'artista.
L'amuesa forma parte del programa del Principáu “Asturies, Cultura en Rede” y ta entamada en collaboración cola Casa de Cultura de Llanes. “Ye una esposición distinta, que nun va dexar indiferente a naide; con un puntu de prevocación, pero prestosa dende'l puntu estéticu”, comentó José Luis Villaverde, presidente de la Fundación del Muséu.
