Cuando “Fibi” –el perru de Paula Carrasco– mira fixo a la so dueña, empieza a lladrar y tien “ticks” nerviosos, ye mala señal. Quier dicir que-y ta dando una hipoglucemia o una hiperglucemia y, entós, tien que dir rápido a poner la insulina. Paula, que tien 21 años, ta diagnosticada de diabetes tipu 1 dende fai doce. Y “Fibi”, que vieno dende Zaragoza de l'asociación de perros d'alerta Canem, ta adomada pa detectar les sos crisis. Dambes participaron esti día nuna ponencia en Llugones de la Selmana Mundial de la Diabetes.
Canem ye una asociación ensin ánimu de lucru que s'encarga d'adomar a perros por qu'identifiquen ataques n'enfermos de diabetes tipu 1 o epilepsia aprosimao media hora primero de qu'asocedan. Tán educaos como “Fibi”: nel momentu que'l golor de los sos dueños varía, indetectable pal ser humanu, atalanten que daqué va mal y pónense nerviosos. Funcionen como un sensor pal so dueñu.
“Pa garrar a ‘Fibi’ primero tuvi un procesu de selección. Fáente una entrevista personal pa determinar qué tipu de perru va más cola to personalidá. Depués, mándes-yos amueses de saliva cuando tienes una hiperglucemia y una hipoglucemia. Tamién tienes que dormir con un peluche, unos calcetos y una camiseta pa que s'avece al to golor”, contó la rapaza.
L'adiestramientu del perru duró seis meses. Depués, marchó a Zaragoza, onde fixo dellos d'exercicios p'avezase al can y, finalmente, llevólu a la so casa de Xixón.
Ellí, siguieron cola so educación pero, quitando la so capacidá pa detectar ataques, fai la mesma vida que cualesquier otru perru. Lo único ye que-y racionen la comida pa da-y la como “premiu” cuando avisa d'ún de los ataques y, si a lo llargo del día nun hubo nengunu, aliméntenlu con la so ración normal. “Los primeros meses, fáente un siguimientu dende l'asociación pa ver qué tal s'afaya l'animal”, esplicó la moza de 21 años. Esti procesu foi fai alredor de dos años y mediu. La so madre, Ana María Rodríguez, “que siempre ta investigando” cómo ameyorar la vida de la so fía, dio cola asociación y decidieron probar. La esperiencia foi bona: “A clase nun la llevo porque pela mañana ye cuando ‘Fibi’ aprovecha pa dormir. Asina peles nueches ta despierta y alerta. Pero sí que vieno conmigo a chigres, playes y hasta a montar a caballu pel monte”, contó la estudiante de maxisteriu na so ponencia.
Cada vez más casos
“Con Paula y el casu de ‘Fibi’, intentamos presentar nueva información. Creemos que nun hai muncha xente que conoza'l proyectu y, por desgracia, cada vez somos más diabéticos”, señaló Silvia Mier, presidenta de l'Asociación de Diabéticos del Principáu d'Asturies (Asdipas). Tamién foi fai alredor de doce años cuando-y detectaron la so diabetes de tipu 1. La so vida tenía que camudar, y la so familia taba perdida dafechu en cómo lo facer. Asina atopó la organización: “Facemos esto pa visibilizar la enfermedá, reivindicar y dar sofitu”. Y por eso siguieron faciendo actos en Siero, conmemorando asina'l Día Mundial de la Diabetes.
