Cola marcha d'Iberdrola, que s'alcuentra somorguiada nel esmantelamientu de la so central térmica, ye reconfortante conseñar qu'otres multinacionales, como ye'l casu de Bayer, siguen apostando pol territoriu de les Cuenques. Una pequeña fábrica que, anque puede pasar desapercibida por tamañu al asitiase al pie de l'almenada térmica de Lada, nun dexa de dar amuesa de puxu y raigañu. Y non solo porque nel so interior la firma produz el 100% del principiu activu de l'aspirina, sinón pola estabilidá qu'ufierten a los sos trabayadores, alredor d'un centenar y mayoritariamente de les Cuenques. 

Va unos díes conocióse que la planta va producir un nuevu principiu activu, el nifedipinu, utilizáu pa l'anxina de pechu y la presión arterial. Va axuntase al restu de productos fabricaos en Lada. Anguaño, la planta tien tres instalaciones granibles, dos d'elles dedicaes al principiu activu de l'aspirina.Trátase del ácidu salicílicu y l'ácidu acetilsalicílicu. “Esto ye lo más importante y ye polo que nos conoz tol mundu”, aseguró Jorge Álvarez, director de la planta, señalando que “tamos bien arguyosos d'ello, porque dende Lada esportamos a tol mundu y l'aspirina ta rexistrada en más de 140 países”. 

Na tercer instalación fabrícase'l clotrimazol, que se comercializa col nome de canesmed y ye onde se va fabricar el principiu activu del nifedipinu. El quintu y últimu productu que se realiza en Lada ye'l butafosfán, de salú animal. Bayer vendió esta llínia de negociu, pero pel momento sigue fabricandose na planta de Bayer pa la nueva empresa. 

Y anque la empresa nun ufierta cifres de producción, el director de la planta sí esplica que, cola cantidá d'ácidu acetilsalicílicu que se produz nun día en Lada “pueden facese más de 20 millones de comprimíos”. Los otros productos, eso sí, tienen una menor demanda. Siguiendo col principiu activu de l'aspirina, caldía sal de la planta, de media, un camión de repartu que fai dos rutes distintes en función de la planta a la que vaiga. “Si va a Alemania, fai'l viaxe per carretera, pero si va a les plantes de Bayer n'EE XX, Arxentina, México o Brasil, va pel mar dende'l puertu del Musel”, apunta Álvarez. Nesti últimu casu, el contenedor que va dir dientro del barcu cárgase directamente en Lada, precíntase y yá nun se vuelve abrir hasta qu'aporte a la planta onde se van realizar les tabletas. “Compruébase que'l precintu que punximos nós coincide cola documentación y que nun s'abrió en nengún momentu y, si ta too correcto, yá descarguen el contenedor”. 

Pa desenvolver tou esti llabor, la planta de Lada nun apara casi nunca, trabayando los siete díes de la selmana les 24 hores del día. “Tenemos cinco turnos; tres trabayen y los otros dos fuelguen, y asina de xeitu rotatoriu”, señala'l director de la planta. Les úniques paraes na factoría faense en Nuechebona y Nuechevieya. Tamién s'apara, de forma global, en vacaciones, ente'l 15 de xunetu y el 15 d'agostu. “D'esta miente facilitamos que'l personal de caltenimientu pueda realizar el so llabor na planta ensin problemes mientres esti tiempu, anque hubo años nos que tuvimos tanta demanda que nun pudimos aparar en vacaciones, y tuvimos qu'entamalo pa facer el caltenimientu de la factoría per partes”. 

Compromisu

Jorge Álvarez fai un incisu pa falar de los trabayadores de la planta, de los qu'asegura “tienen un altu compromisu cola empresa”. “Nótase sobremanera cuando vienen d'Alemania y coméntennos la posibilidá de facer dalgún cambéu p'ameyorar la producción. Nun pasa una selmana y yá fiximos la meyora propuesta, y lláma-yos l'atención enforma porque dicen que n'Alemania necesitaríen tres o cuatro xuntes col personal pa facer los cambeos”. Pero ye que son munchos los factores qu'espliquen esti compromisu. Ún d'ellos que la gran mayoría, alredor d'un 60%, son de les Cuenques y sienten la planta de Bayer “como daqué de so”, afirma Álvarez. 

Amás, la mayor parte de los trabayadores lleven yá munchu tiempu en Lada y hai poca rotación. Ye por eso que mientres esti tiempu surdieron distintes iniciatives ente la plantiya como equipos de fútbol o grupos de pesca. Y a la de xugar a la Llotería de Navidá, tienen toos el mesmu númberu. “Pa nós ye toa una tradición y tou esto da cuenta del bon nivel de compañerismu que se vive na planta”, destaca'l so director. Na planta tamién se celebren los cumpleaños ente los distintos departamentos, ente qu'otros entamen una comida cada ciertu tiempu. “Nós solemos dir comer xuntos casi tolos vienres, somos una gran familia”, apunta Jorge Álvarez.