Gozón convirtióse estos díes na meca de los amantes de les aves. Ornitólogos de tou'l país ya inclusive del estranxeru treslladáronse a la mariña de la comarca avilesina al sabese que dos curuxos nivales, propios de llatitúes ártiques, abellugaben na mariña gozoniega. El so avistamientu ye “la noticia del añu” pa los aficionaos a la ornitoloxía. Fueron más d'un centenar los aficionaos que tomaron el domingu la localidá de Verdicio, onde ún de los exemplares posó en dellos teyaos. Y al otru día siguíen llegando atrayíos pol descubrimientu. A primer hora, decenes d'ellos peñaben la mariña gozoniega, organizaos peles redes sociales, a la busca de los dos exemplares vistos nos últimos díes. Gallegos, madrilanos, vascos, catalanes, andaluces y hasta estranxeros viaxaron a la comarca avilesina atrayíos pol “curuxu de Harry Potter”.

“Enteréme ayeri del avistamientu por un grupu d'aficionaos y güei tire p'acá. Vieno xente de toa España, hasta ún de Cádiz. Ye que ye daqué enxamás visto, y hai dos exemplares distintos. Creemos un grupu de whatsApp pa organizanos y tamos peñando cada teyáu, cada bardial... Unos tán pol cantu de los cantiles, otros pel campu”, esplicó José Luis Lorenzo, ‘Colón’, acabante llegar de Cangas de Morrazo. Los que llegaron esti día a la mariña gozoniega reconocíen el so arrepentimientu por nun garrar el petate en cuanto s'enteraron de la noticia. Los curuxos de Gozón tuvieron el domingu pasáu en dellos momentos a tiru de los oxetivos. Alcontralos al otru día yera como buscar una aguya nun payar. “Tamos amurniaos por nun venir ayeri. Ye la primer observación d'esta especie n'España y creemos que tamién na Península Ibérica”, comentaba'l grupu formáu por Joan Ximenis, Joaquín García de los Ríos y Félix Arribas, que partieron de Madrid a les tres de la madrugada pa llegar a Verdicio cola albancia.

20

Los búhos nivales de Gozón, imán para los ornitólogos de todo el país Ricardo Solís

“Estes coses hai que faceles nel momentu. Ye la primer riegla que tien esto”, señaló un tamién apenáu Koldo Lizundia, vecín de Zarautz. “Yo creo que yá marchó llueñe, seguro que pal Oeste. Tendría que venir yá ayeri, cuando me llegó la noticia, pero xusto acababa de volver d'una ruta en lancha y la mio muyer díxome que descansara. Lleguemos a les siete de la mañana”, añedió. 

A la caza fotográfica de los curuxos de les nieves alleguen tamién los de casa. “Ye un acontecimientu ablucante. Solemos salir a ver fauna. Ayeri (pol domingu pasáu) fuimos a Tarna y cuando llegamos a casa afayamos que teníamos esto al llau de casa. Güei namás tenemos visto gaviluetes y mabees”, esplicó la pareya avilesina formada por Daniel Fines y Nuria López, aficionaos a la fotografía de naturaleza qu'allegaron tamién a Verdicio y a Peñes en busca de suerte. 

“Esto ye daqué bien especial. Ye increíble la cantidá de xente que vieno. Suelo dir a Andújar a ver el llobu cerval y lo qu'hai equí estos díes nun lo tengo visto ellí. Hai xente espardío dende Moniello hasta Verdicio, per tola rasa costera”, espunxo l'uvieín Manuel Fernández en Peñes, prismáticos en mano. 

Armando Clemente, madrilanu asitiáu n'Avilés dende va dos años, lleva dos díes intentando “cazar” col so oxetivu al curuxu de Harry Potter. “Ayeri (pol domingu pasáu) tamién vini a Peñes y nun m'enteré hasta les ocho de la tarde, cuando aporté a casa, de que lu teníen visto en Verdicio. Da una coraxina terrible”, reconoció esti amante de les aves rapaces. 

Los curuxos de les nieves de Gozón lleven dellos díes pela comarca. El sábadu yá foi vistu ún de los exemplares nos cantiles de Peñes. L'alcalde del conceyu, Jorge Suárez, foi ún de los primeros n'acolumbralu: “Diba de paséu cola mio muyer y llamónos l'atención pol plumaxe y porque yera como'l de Harry Potter”. 

L'avistamientu d'estos exemplares ye tou un acontecimientu. El curuxu nival (“Bubo Scandiacus”), ave oficial de la provincia canadiense de Quebec, ye como un santu grial pa los ornitólogos. El páxaru que los amantes de les aves suañen con ver siquier una vegada na vida pasia estos díes pela mariña gozoniega, en llatitúes bien distintes a lo avezao.