Anque nun vivió n'Asturies, Tony Carreño conoz la rexón a la perfección. Fixo más d'un viaxe pa pescudar los sos oríxenes, la vida de los sos güelos. Anque reconoz que nun falaben muncho de la so tierra, nes ocasiones contaes que lo facíen tresmitíen-y una enerxía especial. Isabel Fernández, de Villanueva de Pereda (Grau), y Manuel Fermín Carreño, de La Mafalla (Valdés), son esos güelos d'esti americanu de Tampa, directivu del Centru Español d'esta localidá, qu'aporta una de les munches histories que se pueden disfrutar nel Antiguu Institutu Xovellanos de Xixón na amuesa “Emigrantes invisibles. Españoles en Estados Unidos (1868-1945). Una inmensa historia colectiva apenes conocida hasta la fecha”.
“Foi bona llástima que nun preguntase más”, destaca Carreño sobre les alcordances de los sos güelos, de los que rescató delles imaxes pa esta esposición, como una na qu'apaecen al pie de so padre, Arturo, y los sos tíos Fernando, Manuel, Aida y Lidia. “Dase la situación interesante de que'l fíu d'Aida foi gobernador de Florida mientres cuatro años y formó parte del equipu del presidente Bush padre”, esplica.
Volviendo a la historia familiar, el so güelu Fermín, nacíu en 1884, emigró solu a L'Habana con apenes 14 años, pa trabayar d'estibador. Depués marchó a la industria tabacalera, onde vivió un treslláu a Tampa, pa trabayar na empresa Pendás y Álvarez nel turnu de nueche como serenu. “Empezó descargando les fueyes de tabacu, que yeren de mui bona calidá, y gustára-y llegar a facer puros, que yera onde se cobraba muncho”, afirma.
Foi en Tampa onde Manuel conoció a Isabel, nacida en 1888 y finada en 1990, con 102 años. “Nin siquier faló inglés. Yera la que falaba daqué más d'Asturies. Pero tampoco muncho”, incide'l so nietu. “Pero sí que tenía señardá de les coses de la so tierra, como les castañes: cuando llegaben dellos unvíos asábales en fornu y mecíales con lleche y canela”, remembra. Isabel emigró xunto a otra pareya, que morrió en Tampa pola fiebre mariella. Ellí conoció depués a Manuel, col que sacó alantre a cinco fíos y aprovechó dalguna esperiencia asturiana pa vivir. “Teníen una ganadería de vaques, al par del hospital, que sirvía pa que tuvieren lleche o quesu los enfermos”, asevera.
Tola so vida la fixeron en Tampa. “Nengún quixo volver, teníen la pena de lo que sufrieron n'Asturies”, remembra Carreño. “El mio güelu dicía qu'ellí solo dexara la fame porque nun tenía nengún familiar más”, esplica, primero de detallar la historia de so güela: “Yeren diez hermanes y llegué a conocer nuna de les mios visites a dos qu'entá taben vives”.
La historia de Tony Carreño y el so familiar ye una de les munches que pueden apreciase na amuesa “Emigrantes invisibles”. Nel so casu, amás, ayudó a reconstruyir los pasos d'asturianos y españoles en Tampa, como por casu les lleendes del béisbol Al López, Lou Piniella y Tino Martínez, que yeren fíu, nietu y bisnietu, respectivamente, d'asturianos asitiaos n'América. “Siempre hubo emigración y va siguir esistiendo. Una esposición asina ye clave pa entender por qué la xente marchó pa entamar una nueva vida llueñe del so llar”, conclúi Tony Carreño.
