Yasmin, de 9 nueve años, escucha con atención la corrección que la so profesora, Ainhoa Díaz, fai a los sos deberes. Les sumes, restes y divisiones concéntrense nuna fueya con delles anotaciones al llau. “Y agora les raíces cuadraes”, diz la neña. Ella y los sos seis compañeros tán nel Centru Social El Cristu II. Son estudiantes de los colexos Buenavista II y La Ería, y aporten les tardes del llunes, miércoles y vienres pa siguir axuntando conocimientos. Ye un programa pioneru de refuerzu escolar qu'entamó'l Conceyu esti añu, col enfotu d'ayudar a families que s'alcuentren en situaciones difíciles tres la pandemia. 

Endagora ye una iniciativa entamada en cuatro centros: El Cortijo, Ventanielles, Les Campes y El Cristu. Anque a la lluz de l'acoyida que recibió la propuesta, tanto per parte de los colexos como de los demandantes, el próximu añu va entamase en más zones y va aumentase'l númberu d'aules, y asina lo esplica la concejala de centros sociales y Educación, Lourdes García. “La finalidá ye introducir a los neños na rede de centros sociales. Qu'hasta agora taba más enfocada nun rangu d'edá mayor”, esplica alredor a los estigmes y l'usu residual qu'esiste d'estos llugares. 

L'espaciu tien dos clases que tienen ocho places caúna, disponibles pa neños d'ente seis y 12 años. Un total de 16 menores per día, que s'estremen en dos grupos a lo llargo de la selmana (l'otru aporta martes y xueves). Eso suma 128 mochiles que lleguen apinaes de xeres. Anque les actividaes pendientes del colexu nun son l'únicu fin d'estes xornaes.

Chahd Soldi, Samara Córdoba, Lorena Victoria Leal, Raudel Alejandro Hernández y Salmane Soldi estudien nel Centru Social El Cristu II | Irma Collín

“La primer hora dedicámonos a lo que fixeron na escuela, depués hai un descansu de media hora na que salen al parque y a la vuelta retomamos la enseñanza con distintes temátiques qu'impartimos equí”, esplica la monitora. Al principiu de la selmana toca practicar inglés y pa rematala entámense talleres de llectura, ente medies aprienden sobre científicos y figures relevantes a nivel cultural. Güei toca “La Fábrica” d'Andy Warhol

Magar qu'esta seya una iniciativa de tipu educativu, el consistoriu nun pretende quitar terrén a les academies. “La intención nun ye suplantar a les iniciatives privaes, queremos enseñar exercicios y conocimientu a base d'actividaes y xuegos”, diz la conceyala. Una y bones la función de la que naz esti programa ye la d'ufiertar daqué más que la conciliación escolar en fines de selmana o festivos. 

Según afirma “la profe” (nome col que se refieren a Ainhoa dientro del centru) el sistema ta funcionando perbién porque toos-y dediquen muncha atención y “nun falten nunca”, anque esti día nun taba Hatim y por eso yeren solo siete. Nesi momentu dalgunos tán preparando un exame y el restu repasen delles nociones que quedaron colgaes la sesión anterior. Tamién intercambien sielles y conseyos p'avanzar coles propuestes del día. 

“Buscamos, d'esti xeitu, apurrir esa ayuda qu'agora delles persones tienen más condicionada por cuenta de la situación que viven”, diz la conceyala de Ciudadanos. D'esta manera, los más pequeños lleguen a casa ensin llabores pendientes y solo queda descansar.