L'artista asturianu Rodrigo Cuevas ganó'l premiu 'El Ojo Crítico' na categoría de música moderna. El gallardón concédelu'l programa cultural de la emisora Radio Nacional d'España y va entregase en primavera.

El xuráu reconoz "el carisma del músicu y la so capacidá de traer al sieglu XXI la tradición y el folclore asturianu, la so provocación y el so riesgu estéticu", según una nota de prensa de RTVE.

Amás, añaden que "Rodrigo Cuevas representa a una xeneración d'artistes que nos últimos años apostó pola recuperación del folclore del nuestru país, nel so casu ufriendo, amás, una posición de xéneru".

El xuráu valoró tamién l'apueste que fixo Rodrigo Cuevas por trabayar dende'l mediu rural asturianu nel que vive y onde collabora en crear comunidá dende l'arte.