Suscríbete

Contenido exclusivo para suscriptores digitales

La Sierra de Sobia descúbrese en Quirós

El muséu quirosanu acoyó la presentación de les tres pieces más pimpanudes de la escavación: un puñal, una fíbula y un hachu

El “puñal de Quirós”. | Cortesía d'Adolfo Fanjul

“Tamos delantre d'una sociedá qu'apenes conocemos” dixo esti día Alfonso Fanjul, director de les calicates na Sierra de Sobia, y “queden munchos años de trabayos que van traer munches sorpreses nun futuru”. Fíxolo mientres la so intervención nel salón d'actos del Muséu Etnográficu de Quirós, na presentación de les tres pieces más singulares xurdíes na campaña d'escavaciones, na Sobia, que dixebra y xune los conceyos de Quirós y Teberga. Son tres pieces de la Edá de Bronce: un broche, una daga y un hachu. Caúna d'elles con característiques distintes pero atopaes sorprendentemente en zones de gran altitú, a unos 1.300 metros, nel sector norte de la sierra, y que tienen unos 4.000 años d'antigüedá. 

Nos pasaos meses de setiembre y ochobre, un equipu d'investigadores empobináu pol arqueólogu Alfonso Fanjul fixo delles prospecciones. Ayudaos d'un detector de metales, llograron afayar delles pieces de la Edá de Bronce, y tres cadarmes nuna torca, estos nel conceyu de Teberga. Según Fanjul, “tamos nun momentu mui preliminar de la investigación”. Avanza que, pa campañes futures, espérase estrayer los restos humanos y atopar más elementos na torca. Na braña quirosana de Bustramunde va facese una escavación a modo pa determinar que tipu de poblamientu había ellí.

Les tres pieces de la Edá de Bronce, atopaes precisamente en Bustramunde, son pieces singulares, porque'l broche o fíbula ye'l más grandea atopáu hasta agora n'Asturies. Usábase como una especie d'imperdible pa suxetar una capa. Ye un oxetu funcional, ensin decoración y al que-y falta l'aguya. Contien una gran cantidá de bronce y ye un bien de luxu, probablemente de dalgún individuu preeminente na tribu. El denomináu “puñal de Quirós” puede tener unos 4.000 años, daqué que se va determinar más esactamente en próximes escavaciones. Según Fanjul, “llama l'atención lo estilizao de la pieza, tovía güei se podría clavar”. Suponse que nun ta enteru: la pieza de bronce taba engastada nun mangu de cuerna de venáu, posiblemente, y yera funcional. Nun yera decorativu nin sirviría d'ufrienda como otros puñales qu'apaecen n'otres escavaciones. 

Tamién se presentó un hachu pequeñu, de bronce, d'una cronoloxía averada a les otres dos pieces. Ye de pequeñes dimensiones, tendría tamién un mangu, y creen qu'al nun ser funcional podría usase como moneda o pa un tipu de trueque o intercambiu. Sería una especie de lingote, visto'l bronce que lleva. 

Les tres pieces de bronce abulten ser una producción local, que s'abastecería de les mines de cobre del Aramu, que nesa dómina esplotábense. Estos elementos presentaos nel Muséu de Quirós, xunto colos afayos que va unes selmanes s'enseñaren en Teberga como una punta de flecha, de bronce, o los restos humanos de tres individuos, atopaos nuna torca de Teberga, abren un abanicu d'investigaciones futures. 

Hasta agora contábase con que los humanos que vivíen na Edá del Bronce habitaben en cueves, al pie de los ríos, pero los descubrimientos fechos pol equipu d'Alfonso Fanjul aporten munchos datos pa creer en poblamientos humanos n'altitú. Estos nun yeren poblaos fortificaos, tipu castru, sinón pequeñes comunidaes de pastores y cazadores que s'aprovechen de los recursos de la zona, con dalgún tipu rudimentariu d'agricultura, y que podíen ser estancies temporales. En dellos llugares hai una esplotación intensiva que provoca un hábitat deforestáu según los analises del polen. 

“Grandes meyores”

Fanjul cree que va haber grandes meyores n'escavaciones futures. Estes van determinar qué tipu de sociedá yera la que vivía na Sierra de Sobia na Edá del Bronce. Con namás unes prospecciones salieron estes pieces: cuando s'escave podrá entendese que facíen ellí esos oxetos y que fin teníen. 

Al respective de la torca tebergana colos tres cuerpos humanos ábrense munches hipótesis. Piénsase que fueron azotaos ellí, ensin vida, porque, anque l'accesu ye difícil, hai posibilidaes de salir. Ún de los cuerpos presenta una incrustación, nel coxis, d'un cachu de caliza. Fanjul piensa qu'igual cayera, al presentar graves traumatismos y tener esi fragmentu líticu incrustáu, y que ye probable que tuviera por ello problemes de movilidá. Ello ye, que depués de dos o tres años asesínenlu y échenlu a la torca. Piensa nun tapecimientu de los restos porque nesa dómina, de los entamos de la romanización, los cuerpos incinérense. A estos restos van realizáse-yos un analís d'isotopos que va determinar con gran exactitú qué tipu de dieta llevaben. 

Entá queda enforma por afayar y la Sierra de Sobia promete dar muncha información sobre'l poblamientu humanu na Edá de los Metales. L'añu que vien, col sofitu de los Conceyos de Quirós y de Teberga, van escavase los llugares que paecen más aparentes. Queden munchos enigmes por resolver.

Compartir el artículo

stats