El “Merlí” xixonés que saca la Filosofía de les aules
El profesor Eduardo Infante, del colexu San Eutiquio, imparte delles clases colos alumnos na cai: “La Filosofía y la vida nunca tuvieron que se desconectar”
Los alumnos con Infante. / Pablo PALOMO,
Anque Eduardo Infante tien acentu andaluz y non catalán, esti profesor de Filosofía del colexu San Eutiquio ye'l “Merlí” xixonés. Como'l maestru interpretáu por Francesc Orella na popular serie de televisión, Infante convierte la clase de Filosofía nun espectáculu. Un espectáculu pensáu pa que los sos alumnos cavilguen y piensen. Daqué habría pa qu'Infante, que publica los sos artículos en LA NUEVA ESPAÑA, se conviertiera nun superventes col so primer llibru, “Filosofía en la calle”, al que depués siguió “No me tapes el sol: Cómo ser un cínico de los buenos”.
Infante nun quier que la Filosofía quede nes aules. Por eso, aprovechando que'l xueves pasáu se celebró'l Día Mundial de la Filosofía, llevó a los sos alumnos de primeru de Bachilleratu a dar la llección a la plaza Mayor de Xixón. Sentaos en círculu, los estudiantes aldericaron sobre l'albuertu. “La Filosofía nació nes places y hai que reivindicar el so papel”, afirma.
Nacíu en Huelva fai 44 años, Infante camudó'l so enfoque docente tres la respuesta d'una alumna. “Vila mirando pela ventana, distrayida, y pregunté-y que si yera eso más interesante que l'exame del xueves. Díxome que taba mirando la vida. Desarmóme”, recuerda'l profesor.
El profesor con ún de los sos llibros. / Pablo PALOMO,
Daquella exercía en Sevilla. Camudó'l so métodu. “Llevelos a un parque y fueron los alumnos los que m'empezaron a dar clase. Tomé nota de los sos problemes y empecé a pensar cómo resolvelos. A la fin, la Filosofía y la vida nunca tuvieron de tar desconectaes. Como dicía Sócrates, filosofar ye esaminar la vida”, indica.
Y asina hasta güei. Infante llegó a Xixón va dos décades y exerce nel San Eutiquio dende va once años. Les sos clases sálense de lo común. Cuando esplica a Aristóteles, lleva a los sos alumnos a caminar per Cimavilla como los discípulos del pensador griegu, los peripatéticos, qu'avezaben a da-y al cocu mientres andaben. Si toca Sócrates y la so muerte, la clase impartela nel Palaciu de Xusticia, pa “que vean el que foi'l primer gran xuiciu de la democracia”, detalla.
La llección d'esti día d'Eduardo Infante na plaza Mayor de Xixón. / Pablo PALOMO,
La pasión docente d'Infante agradecenla los alumnos. Cuéntenlo Lucía Rubiera, Claudia Cuesta y Alea Ponte, tres bachilleres que destaquen les bondaes d'esti métodu educativu. “Ye'l nuesu ‘Merlí’ particular. Fainos entender la filosofía d'otru xeitu y sácanos de la nuesa zona de confort d'otres clases”, razonen estes tres moces. Infante tamién ye mui activu en redes sociales, especialmente en Twitter, onde aveza a mangar una entruga diaria pa facer cavilgar a los sos estudiantes. “Ye bona idea reivindicar el papel de la Filosofía nos nuesos díes. Ensin ella nun habría ciudadanos. Hai que recordar que nes aules sirve pa formar ciudadanos, non solo trabayadores. A la fin, ser filósofu nun ye más que lluchar contra la babayada”, ataya'l “Merlí” qu'enseña en Xixón.
- El nuevo negocio en el que entra Alimerka y que tendrá su primer establecimiento en Gijón
- En liquidación uno de los principales fabricantes de ventanas de Asturias con un pasivo de más de 1,5 millones
- 6,50 euros: el dinero que ofrece Adif a una joven ganadera asturiana por dejar su explotación y que no da 'ni para un saco de pienso
- ¡Final feliz en Cudillero! Encuentran vivo en el bosque al octogenario desaparecido tras día y medio de búsqueda
- La llamada de auxilio a su hijo del octogenario desaparecido en Cudillero: 'Ven a traeme un palu, a ver si soy a levantame
- Atención conductores asturianos: un nuevo radar móvil entra en funcionamiento en la 'Y
- La nieve da un tregua en Asturias: el Huerna recupera la normalidad tras el cierre por un accidente de camión y en Pajares ya se circula sin restricciones
- Atención conductores asturianos, el cambio de velocidad en autovía a 100 kilómetros por hora por el nuevo radar de la DGT: dónde está y cómo funciona
