La Tertulia Malory, de L'Entregu, escoyó como meyor llibru n'asturianu de tolos que s'editaron nel 2020 al poemariu 'Les isles inciertes', del escritor y periodista Xuan Bello.
El xuráu tuvo formáu polos escritores Xulio Arbesú, José Luis Rendueles, Solinca Turbón, Roberto Corte, Laura Marcos, Aique Fernandi, Beatriz Quintana, David Fernán, Chechu García y Henrique G. Facuriella, que fallaron el premiu nun actu celebráu na tertulia'l 19 de payares de 2021.
El xuráu destacó, nel acta del fallu, "ye un poemariu atemporal, nel que l'autor fai un diálogu cola tradición poética universal, nun viaxe d'enorme valor artísticu onde resuenen los ecos de los grandes maestros".
El xuráu tamién destacó la gran calidá de la producción lliteraria n'asturianu del añu 2020, lo que fixo que la decisión de premiar el poemariu de Xuan Bello fuera por mayoría. El gallardón consiste nuna ilustración d'Alfonso Zapico y una medaya conmemorativa, que se van entregar nun actu públicu en L'Entregu en feches próximes.
