D'una nave nel polígonu de Meres salen camiones con destín al mundu. Nes caxes que carguen vense los destinos: Italia, Portugal, Francia... Nel centru d'Asturies hai una fábrica de suaños: superhéroes de tamañu real escolten les puertes, los pitufos conviértense en realidá nos talleres y los escenarios de les películes de Marvel pueden tocase y pisase. “Si puede imaxinase, puede programase”, reza una de les parés nes que los inxenieros informáticos desenvuelven videoxuegos de realidá virtual que, darréu, van estrenase n'otres partes del mundu. Son NoGroup, un conglomeráu empresarial qu'acueye nueve firmes distintes d'alta tecnoloxía, diseñu, fabricación, márketing o xestión de centros d'ociu. Son los xestores, ente otres coses, de MadLab, el centru d'ociu qu'abrió les sos puertes nel bulevar del Vasco.
L'uvieín Corsino Tamargo ye la máquina de les idees, diz la CEO de NoGroup, María José Posada, mientres percuerre les oficines de la empresa. Tamargo ta n'Alemania cerrando un nuevu contratu, pero'l so despachu ta abiertu. Los xuguetes tán tremaos pel suelu. “Los fíos de los emplegaos nun se creen que los sos padres vengan equí a trabayar”, diz Posada. Les marques coles que trabayen van dexando productos na sede de la empresa y lo que se va retirando de los eventos acaba afatando les parés y les meses de los despachos. Los Minions de la popular película de Illumination convirtiéronse en cuadros como “El Berru” de Munch o los relós de “La Persistencia de la Memoria” de Dalí. “Esto foi d'una esposición que fiximos nel so día”, esplica la directora de la empresa.
NoGroup asitió en Meres va un llustru y nun dexa de crecer. La responsable de MylIdeas, la empresa encargada de fabricar los productos, los muebles y les recrecaciones a tamañu real de lo qu'imaxinen los sos compañeros cuenta que la so empresa empezó faciendo pequeños vinilos nun pisu, diendo puerta per puerta pidiendo presupuestu. Güei, hailu que viaxa dende otros continentes pa ver lo que faen. “Tamién tenemos oficines en Madrid y cuando dicimos que fabricamos too n'Asturies nun entienden nada”, esplica Posada.
A poco y a poco, fueron abriendo nueves empreses que, collaborando ente elles, crearon sinerxes que los ayuden a crecer, a ufiertar un productu más completu. “Hai marques que vienen venos ensin saber lo que quieren y yá-yoslo damos too fecho”, diz la empresaria. Nuna sala, los inxenieros electrónicos converten en realidá les idees más absurdes. “Equí, si queremos un gochu que vuele dicímos-yoslo a la xente d'esta sala y, nun sabemos cómo, pero'l gochu termina volando”, diz la CEO entrando na sala. “Mangámoslu nuna catapulta y llisto”, contesta ún de los inxenieros.
Los fíos de los emplegaos tienen un pocu de razón. Na sala apegada, onde se desenvuelve la realidá virtual, tres emplegaos lleven puestes les gafes y ximielguen los mandos que lleven nes manes. Seya como quier, reconocen que nun tienen bien claro cómo les grandes multinacionales siguen enfotaos n'ellos. Solo nel MadLab Uviéu fixeron una inversión de más de tres millones d'euros, y los camiones nun dexen de salir.
