L'escritor Francisco Álvarez (Xixón, 1970), resultó ganador de la quinta edición del premiu de rellatos curtios 'Xosé Caveda y Nava', convocáu pol conceyu de Villaviciosa y que tien una dotación económica de 1.000 euros.
El xuráu, formáu poles escritores Marta Mori y Lourdes Álvarez y el filólogu Ángel Valle, decidió por unanimidá conceder el premiu al rellatu tituláu 'Les cenices de les últimes pallabres', del que destacó "el trabayu de documentación histórica, la capacidá de suxerencia de la trama y la fluidez y maña nes técniques narratives".
Francisco Álvarez ye escritor, periodista y traductor, y resultó ganador del premiu Xosefa Xovellanos de novela dos veces. La entrega del premiu, qu'inclúi una mazana de plata conmemorativa, ta prevista pal día 21 de febreru.
