L'asentamientu romanu de La Estaca nun dexa de sorprender. Un estudiu de recién con xeorradar acaba de desvelar la esistencia d'otres dos construcciones al par del xacimientu que nos últimos años s'escavó por aciu de delles campañes financiaes en gran parte con donaciones de l'Asociación d'Amigos de la Villa Romana de La Estaca. L'afayu consiste nuna habitación amiesta conectada col sistema de cañeríes afayáu'l branu pasáu y otru habitáculu aislláu que la so fecha de construcción xenera duldes a los investigadores. 

Los resultaos del estudiu fueron treslladaos va pocos díes a la Conseyería de Cultura, que financia esti tipu de trabayos “non invasivos” al traviés d'una llínea d'ayudes pa indagaciones sobre'l patrimoniu asturianu. “Esto dexa claro que'l xacimientu sigue creciendo”, apunta l'arqueólogu Juan Ramón Muñiz, director de les escavaciones realizaes na zona, satisfechu porque'l tiempu-yos vaiga dando la razón sobre'l caláu de la villa, con un orixe que se calcula alredor de los sieglos II ya III de la nuesa era. 

Muñiz da por fecho que l'habitación amiesta “ye de la mesma dómina”, magar s'amuesa prudente sobre l'orixe de la otra construcción, más desapartada. “La técnica de xeorradar ta llindada a la d'esclariar determinaes cuestiones”, almite confiáu en que les sucesives campañes dexen siguir asoleyando la construcción reguerana. “Hai potencial p'afayar más coses”, indica l'espertu, que lleva yá cuatro años enfotáu nel xacimientu tres l'afayu casual nuna de les habitaciones de la villa d'un mosaicu romanu perbién calteníu y asemeyáu a otru atopáu a pocos metros a mediaos del sieglu pasáu. 

Siguir la fueya de ruta

Magar la importancia d'esti descubrimientu, los arqueólogos nun cuenten variar los sos planes. “Independientemente de les meyores de los estudios de xeorradar, vamos siguir col cronograma previstu de siguir escavando mesmo les habitaciones yá conocíes como un camín de la construcción”, anuncia Juan Muñiz, convencíu de que les próximes campañes van aportar nueves sorpreses tanto a investigadores como a los munchos vecinos que cada añu faen aportaciones pa costear les sucesives campañes arqueolóxiques. 

Los investigadores esperen que los afayos de los últimos branos, xuníos al resultáu del estudiu de xeorradar, ayuden a captar dalgún mecenes interesáu en conocer más detalles sobre un asentamientu que podría inclusive esparder per tol valle nel qu'asitia La Estaca. “Llevamos tiempu intentando ensin ésitu llograr fondos d'entidaes privaes y fundaciones, pero inda nun perdemos la esperanza”, indica l'arqueólogu, que cada branu encabeza un grupu d'investigadores y voluntarios ansiosos por conocer l'orixe romanu de Les Regueres.