Villaviciosa ponse a la vanguardia de l'agricultura 4.0. El Centru Tecnolóxicu de la Información y la Comunicación (CTIC) va asitar llueu nel centru d'esperimentación y d'innovación pal mediu rural qu'entamó nel valle de Pion un invernaderu intelixente que va suponer una auténtica novedá pa esti ámbitu d'investigación. Y ye que, a diferencia de los que yá esisten n'otros institutos agrícoles y ganaderos, centraos nel estudiu de l'agronomía, el que se va encargar de momentu pal equipamientu maliayés va diseñase específicamente pa xenerar “conocencia y resultaos de software y hardware” col envís del desenvolvimientu de l'agricultura 4.0, basada nuna mayor eficiencia, rendimientu y automatización de l'actividá gracies a la implantación de les nueves tecnoloxíes.

L'invernaderu intelixente de Pion va estremar en cuatro contenedores y va allugase al sur del edificiu qu'acueye'l denomináu “Ruraltech” del CTIC. Caún d'esos espacios va ser una zona específica d'esperimentación y van contar con un bancal eleváu dotáu d'un sistema de climatización independiente, por que puedan tar a distintes temperatures. Los rangos nos que se van mover bazcuyen ente los diez y los cuarenta graos. Polo que se refier a la humedá, va haber un sistema de regulación pa consiguir porcentaxes que vaigan del 40 y al 100.

Somostriella de lluvia

 El contratu que llanza agora'l CTIC pa contar con esti equipamientu, que'l so costu cuéntase qu'ande pelos 156.000 euros, inclúi sistemes pal so escurecimientu por aciu de llones o plaques opaques, que permiten dexar ensin lluz a los cuatro bancales al tiempu, mesmo la somostriella de lluvia, sía al traviés de microaspersores o con rociadores que dexen incorporar “cobertores d'agua” d'intensidá controlada.

Otru de los servicios con que van contar estos modernos invernaderos consiste nuna illuminación regulao y enfocao a les necesidaes del cultivu que se tea estudiando en cada barcal. L'oxetivu primordial ye, según indiquen los promotores de la iniciativa, “asemeyar el ciclu del día y la nueche”, algamando, si ficiera falta, la lluminosidá d'un día soleyeru dafechu.

 La intención del CTIC ye disponer d'estos dispositivos nel so centru d'investigación agraria de Pion primero que concluya'l presente exerciciu. L'equipu de “Ruraltech” ta especializáu na analítica de datos ya intelixencia artificial al serviciu de les esplotaciones forestales, el control de los montes al traviés de la sensorización, la monitorización de los animales de la redolada o'l control de la trazabilidá de los productos ecolóxicos per medios tecnolóxicos. La so actividá estructúrase en cinco llínees de trabayu: tresformamientu dixital pa empreses rurales, innovación tecnolóxico pa la calidá de vida de les persones, sofitu a entidaes y grupos de desenvolvimientu local, amueses de tecnoloxíes rurales y llugar d'alcuentru p'axentes rellacionaos col sector.

La Fundación Centru Tecnolóxicu de la Información y la Comunicación (CTIC) constituyóse'l 5 d'avientu de 2003 como una organización de naturaleza fundacional privada, de calter cultural, social y benéficu-docente, ensin ánimu d'arriquecimientu. “Ruraltech” ye'l so apueste pa definir y diseñar l'aldea 4.0 d'Asturies.