El monasteriu de San Salvador de Corniana, en Salas, convirtióse nun palombar. Páxaros y esperteyos son los habitantes d'esti enclave venceyáu a la vía xacobea, qu'en 2024 va celebrar el so primer mileniu d'historia. Nin ser Monumentu Nacional, Bien d'Interés Cultural y finxu del Camín de Santiago, declaráu Patrimoniu de la Humanidá, nin que los vecinos lleven tres décades reivindicando la so rehabilitación, sirvió pa la so igua completa. L'estáu de ruina avanza día ente día con filtraciones d'agua, resquiebres de la cantería y l'espoliu d'elementos constructivos y decorativos.
Por ello, l'asociación Hispania Nostra volvió incluyilu na “llista colorada” del Patrimoniu, tres retiralu en 2016 col anunciu d'un plan d'inversión estatal qu'entá nun s'executó. “Yera inevitable que volviera entrar na llista, porque nun se tenía que sacar en nengún momentu. Con promeses d'obres lleven dende 1998. Ye un toque d'atención y el respaldu a les nueses denuncies”, afirma David Valiela, voceru de la plataforma social “Salvemos la ilesia y el monasteriu de Corniana de la ruina”.
A la entrada del claustru, una manguera percuerre'l pasiellu con goteres que tán estropiando'l suelu empedráu. El mugor desconcha les parés y les bóvedes. Los suelos de madera tán intransitables y les puertes caen pol foroñu. Nes escaleres, meyor nun pisar. Amás, hai oxetos inverosímiles apecuñaos, como sielles de terraza o los muebles de lo que foi una escuela taller.
Les ventanes de la planta baxa fueron tapiaes polos vecinos pa evitar la entrada d'estraños, pero nun sirvió pa frenar l'ímpetu de les persones que se colen dientro y que protagonizaron robos y estroces. Amás, les estancies tán enllenes de cagarates de palombos y esperteyos, con una espesura d'unos cinco centímetros. “Na torre lleguen a los venti centímetros”, detalla Valiela. “Ye un fedor insoportable, inclusive col mázcaru, y xenérense afecciones sobre l'inmueble porque les cagarates tienen sustancies corroyentes”, añede.
Tolos animales qu'habiten el monasteriu medieval fáenlo al abellu d'un teyáu anováu pol Principáu d'Asturies nel añu 2015. “Ye murnio y rescampla l'abandonu y la dexadez de l'Alministración”, llamenta Valiela. Por eso, el colectivu ciudadanu del que ye voceru ve con rocea la partida pluriañal de los Presupuestos Xenerales del Estáu pal inmueble, dotada con 1,6 millones d'euros.
“Esti 2021 contábase con un gastu de 200.000 euros que nun vimos n'obres”, repostia Valiela. Amás, tán pendientes les dotaciones de 2022, con 404.000 euros, y les de 2023 y 2024, con una asignación de 500.000 euros pa cada exerciciu. Tou por que l'edificiu, antiguu epicentru políticu y relixosu de la comarca, lluza anováu pa la celebración de los so primeros mil años. “Col ritmu que llevamos, la rehabilitación del monasteriu nun va tar fecha pa esi festexu, y los actos van tener que facese fuera. Creemos que ye una obra de munchu aquel y tampoco nun se puede facer a les carreres”, señala Valiela.
La plataforma ciudadana fai un llamamientu a los colectivos y movimientos culturales con un mayor pesu pa que los sofiten na so llucha pola reforma integral del monasteriu. Esperen que los 200.000 euros previstos pa esti añu se tengan usao “en proyectos” y que los obreros entren llueu a trabayar nel inmueble. Un símbolu de la historia del Camín de Santiago que “ye un palombar, sometíu a una esgonciadura continua que desfai la piedra y la madera”, conclúi Valiela.
