Los inventores del agro-rock vuelven a la carretera y a los escenarios con “ánimu y ganes de tirar p'alantre”. Tres dos años ensin conciertos, cola axenda conxelada pol covid, “Los Berrones” van a por toes nel so 35.º aniversariu. Ramón Blanco y Olegario Méndez presentaron esti día n'Uviéu la xira cola que cuenten celebrar esi acontecimientu, “Tour Añu 1 D. C. (dempués del Covid)”, que va entamar el 8 de xineru nel Centru Niemeyer d'Avilés, con un conciertu nel que van tocar xunto a la Banda de Música de Pravia. Depués van viaxar per media España, van visitar Cantabria, Galicia y Madrid de mano. “Dempués d'estos dos años ensin actividá encarámoslo con más ganes”, anunció Ramón, y el so compañeru Olegario esclarió qu'esta xira va llevalos pelos meyores escenarios del país, sales como La Riviera en Madrid.
Los miembros de “Los Berrones”, que fixeron la presentación na sede la Sociedá Xeneral d'Autores (SGAE) n'Uviéu, anunciaron que va ser “una xira especial na que van participar artistes de cada zona”. Los sos nomes dirán confirmándose sobre la marcha.
La banda de Tolivia dio'l so primer conciertu en xunu de 1987, recordaben esti día Ramón y Olegario, y por él cobraron un par de botelles de sidra, poco más. Empezaron a cantar n'asturianu ensin nengún enfotu reivindicativu, reconocen. Fixéronlo asina porque “yera lo que nos salía” y eso nun-yos torgó tener siguidores fora d'Asturies. Tán a favor de la cooficialidá. “Falamos n'asturianu con normalidá y la oficialidá sería lo más normal del mundu”, opina Olegario. El so compañeru añede: “Hai muncha xente y bien activa en contra de la oficialidá con argumentaciones falaces: el gastu, el nacionalismu escluyente, que si se pierde la variedá de los bables... Son babayaes”.
Na so xira d'aniversariu tán confirmaes delles feches y escenarios. El sábadu 7 de mayu van tocar nel Escenariu Santander, na capital cántabra; el 4 de xunu na Sala Capitol de Santiago de Compostela y el 24 de xunu en La Riviera en Madrid.
La banda asturiana cuenta rematar la xira con un gran conciertu n'Asturies y con collaboraciones d'otros artistes.
“Los Berrones”, con un repertoriu que forma parte del mancomún de los asturianos, estrena imaxe nes redes sociales y web (@www.losberrones.com).
