Carecen Síndrome de Down, pero son Laura, Adrián, Cristian, Tania, Victoria y Aleida, con motivaciones y histories de superación que los faen únicos. Y asina ye como quieren presentase. Participen nel cursu de formación y orientación prellaboral que s'imparte na Asociación Down Asturies d'Uviéu p'ayudar a recatiar la fendedura qu'atopen al terminar la educación obligatoria. Güei toca facer adornos navidiegos pa vender na cooperativa. “Empezamos con esti proyectu va seis años porque nun teníen ufierta formativa al salir del institutu”, esplica Ana Luque, xerente de la organización.

Aleida Llano

Tania Alonso, de Cangas de Nacea, y Cristian Rodríguez, de Pola de Siero, llegaron a Uviéu col enfotu de siguir formándose, y llográronlo con ésitu. La primera sacó plaza nes oposiciones al SESPA (Serviciu de Salú del Principáu d'Asturies) pa persones con discapacidá; el segundu realizó práctiques n'Ikea. “Agora gustaríame trabayar como carteru”, cuenta Rodríguez.

Laura Campo

La finalidá ye integra los nel mercáu de trabayu de manera progresiva, siempre cola mirada puesta na madurez y la responsabilidá. Según afirma la xerente, esiste un vezu mayoritariu a la infantilización de les persones Down: “Son adultos, como cualesquier de nós y creo que ye una amuesa de respetu trata los como talos”. La clave ta na normalidá, por que nun tienen enfermedá nenguna. “Nin tien cura nin fai falta”, añede Luque.

Cristian Rodríguez

Otru problema, que de nuevu xira alredor del desconocimientu y la desinformación, son los clixés qu'asitien a toles persones con discapacidá –non discapacitaes, porque eso ye axetivales y poner el focu no negativo, espliquen na asociación– nun mesmu caxón. Esiste muncha lleenda urbana sobre'l so calter (dacuando son descritos como cariñosos, otres como fociconos) y la protección que riquen. “Enantes necesitaben que los cuidasen; agora asumen el rol de cuidador”, respuende Luque énte la cuestión sobre la evolución de la imaxe social qu'esperimentó l'asociación a lo llargo del tiempu.

Victoria Tascón

Dende los empiezos, en 1985, hasta güei, Día Internacional de les Persones con Discapacidá, cada vez son más los miembros que se dediquen a centrar la so atención nos demás: cuiden de los sos familiares mayores, realicen voluntariáu n'hospitales, trabayen en residencies de tercer edá... “Yo ayudo al mio tíu cola obra de la so casa nueva”, cuenta Cristian Rodríguez

Por eso, animen a conocer primero a cada individuu, en cuenta d'asumir la so predisposición a ciertes actitúes en base a un cromosoma, situación que les persones con diversidá funcional sufren dende'l trubiecu. “Munches vegaes nos colexos cataloguen a los estudiantes como alumnos o persones con necesidaes educatives especiales”, señala Luque. Daqué que considera inxusto porque supon una etiqueta discriminatoria: “Caún tien les sos peculiaridaes”. 

Dientro d'esta naturalidá atopa la normalización de la situación. L'asociación imparte charres por que los sos miembros conozan en qué consiste'l Síndrome de Down y cómo tol mundu tien virtúes qu'aportar a la sociedá. “Nun hai nada qu'esconder”, defenden, porque solo s'escuende aquello que resulta adverso. Y asina, ente boles, estrelles y árboles de Navidá entemecen tanto vides como trayectories que van más allá del nome qu'un médicu británicu-y punxo en 1866 a un trestornu xenéticu.