La partida pa promoción del asturianu recoyida nel proyectu de presupuestos pa 2022 xube a 2.205.441, lo que supón --al igual que nes cuentes del 2019 y 2020-- el 0,04% del total de les cuentes autonómiques.

Nes cuentes vixentes la promoción del asturianu tenía una partida de 2.077.271 euros, polo que'l presupuestu de política llingüística pal 2021 xube en 128.170 euros. Sicasí, al producise una medría xeneral del presupuestu autonómicu, la partida continúa representando'l 0,04% del total de les cuentes.

Ente les partíes que xuben ta la destinada a RTPA, que pasa de 70.000 euros a 100.000 euros, qu'hai que sumar al presupuestu públicu que yá recibe la cadena. Per otru llau, la Sociedá Pública de Xestión y Promoción Turística y Cultural va recibir 150.000 euros y la Universidá d'Uviéu 14.400 euros.

Tamién va haber subvenciones a los servicios de normalización de la Comarca de la Sidra, Cabu Peñes, Avilés, Mieres, Llangréu, L.lena, Cangas, Samartín del Rei Aurelio, Corvera, Castrillón, Llanera, Grau-Candamu, A Veiga, Ribeseya y el Parque Históricu del Navia. Desaparecen los de Siero y Llaviana. Amás, la Federación Asturiana de Conceyos va recibir 86.000 euros.

Per otru llau, l'Academia de la Llingua Asturiana va tener --si salen alantre los presupuestos-- 240.000 euros, 20.000 más qu'anguaño. Otra manera, hai partíes p'actividaes culturales, promoción del asturianu nos medios y la promoción del llibru, onde tamién hai una partida de 10.000 euros pa que les biblioteques públiques merquen llibros n'asturianu o gallego-asturianu.

Otra manera, tamién s'inclúi la convocatoria de los cinco premios lliterarios, el Premiu Nel Amaro de teatru profesional y el Premiu al Meyor Cantar, amás de la ellaboración y xestión de les convocatories de les prebes de certificación correspondiente a los niveles de competencies en llingua asturiana.