Cuando Aida Oceransky asitió n'Uviéu, yá conocía'l valor de tener una comunidá na que sofitase. Los sos güelos sortearon la muerte na Shoá (Holocaustu) de Kiev y eso llevólos hasta México DF, onde ella creció. Según asegura, mesmo'l tiempu como les migraciones tienen visto a los xudíos buscase unos a otros pa dase abellugu. “Cuando tas solu, allegues a los tuyos por que te sofiten”, esplica la presidenta de la Comunidá Xudía del Principáu d'Asturies. Por eso, en 1972, un añu depués de llegar a la ciudá, quixo honrar la so relixón acompañada polos que compartíen les sos creencies y formalizó llegalmente los estatutos de la Comunidá “Beit Emunáh” (na actualidá tien 120 integrantes).
Ente les feches señalaes nel calendariu hebréu ta la Janucá, tradicional fiesta de les Lluminaries, que se remonta al 332 a. de C. y concide colos festexos navidiegos del cristianismu. Dende va tiempu comparte l'encendíu de los sos veles con tolos uvieinos, como pasó esti día sábadu tarde na plaza del Fontán. Nun foi siempre asina asina. Esta ye la última parte d'una llarga trayectoria d'adaptación. De primeres había munches ganes d'axuntase y pocos medios pa facelo. “Naide tien en casa una pota pa más de 30 persones, nin tantes sielles...”, esplica Oceransky. Resultaba una odisea celebrar la so 25 de Kislev (fecha xudía) d'un xeitu caseru, toos con oxetos y cacía d'un llau pa otru, según ilustra. Nun yera l'únicu problema. A la precariedá sumábense la falta de llibertá relixosa na dictadura y la nula relación ente España ya Israel, qu'enzancaba la integración plena del colectivu.
Adulces, la falta de llibertaes foi iguándose. Yá solo quedaba atopar un llugar de cultu. Llegó nel añu 2000 al tiempu que la donación de “la casina” del Fontán de parte del Conceyu. “Un amigu de Gabino de Lorenzo propúnxo-y tener un xestu colos xudíos como compensación pol sufrimientu que careciera esti pueblu. Y equí tamos”, cuenta la presidenta. La primera y única cesión municipal española al cultu d'esti colectivu: “Vamos tar eternamente agradecíos”.
El siguiente pasu foi amosar la so cultura al restu de la xente. Según afirma Oceransky, ente la so amestadura de sangre tamién hai una parte asturiana, por que mudó a esta tierra mui moza xunto al so maríu y pasó más tiempu nella qu'en cualesquier otra parte. “Queremos que nos vean como a ún más. La xente integrónos perbién, los vecinos son prestosos y queremos devolver lo mesmo. Somos xente de paz”, afirma. Por eso'l Janucá volvióse una celebración pa toos dende fai una década.
El sábadu, entamando esa selmana de festividá, salieron colos sos candeleros de siete brazos –meyor llamaos menorá– a la plaza pa enllenalo too de lluz. Ensame de veles prendíes que según el vezu recuerden que siempre hai esperanza: “Somos un pueblu que sabe qu'a la fin acaba por abocanar”. Ye un momentu emotivu, porque pa ellos trátase de convertir la escuridá del iviernu nuna llume identitaria. Ye, amás, la única celebración que saquen a la cai. El restu d'ocasiones señalaes faenles "de puertes pa dientro”.
