De magar tien usu de razón, el naviegu Rodrigo García Istillarty siente fascinación polos belenes. Recuerda perfectamente les sos primeres creaciones usando corchu y tamién cómo empezó a dar movimientu a delles figures gracies a l'ayuda del so güelu, lletricista xubiláu. Trés décades depués, atesora'l que se tien por unu de los belenes más grandes d'Asturies y que, colos postreros 15 metros qu'acaba d'incorporar, algama los setenta y cinco metros cuadraos de superficie espositiva. Podrá visitase hasta'l 6 de xineru nel polideportivu de Santiso d'Abres, conceyu nel que vive dende fai más d'una década. 

“Ye un belén panorámicu, que puede vese por más de trés llaos, monumental, pol tamañu de les pieces, y bíblicu porque ta inspiráu en Palestina”, esplica esti belenista, diseñador d'interiores d'oficiu, que tamién ellabora pieces por encargu y restaura belenes estropiaos. Cuenta con más de 150 figures, que merca en blanco y ocúpase de pintar y preparar al so gustu, y con unes sesenta edificaciones inspiraes na antigua Palestina y que foi faciendo añu a añu gracies a la información que diba sacando de películes como “La historia más grande enxamás contada” o “Ben-Hur”. “Recuerdo dir aparando'l vídeu pa facer bocetos de l'arquitectura que más me gustaba y depués recrealo”, esplica. 

Anque'l so belén sobresal poles sos dimensiones, esplica que nunca tuvo pretensión de llograr ser el mayor, sinón que lu mueve más “la calidá”. Y eso vese nel esquisitu gustu de cada escena, onde nun falten infinidá de detalles. Apetez perdese peles cais de la so ciudá o adientrar en dalguna de les dependencies onde se trabaya, como nel requexu de l'alfarera onde se recrea con tou luxu de detalle l'interior d'una vivienda. En total, cuenta con diez figures en movimientu a lo llargo d'esta instalación. “Pa mi esto va más allá de la relixón, ye arte”, diz de la que se confiesa “mui perfeccionista y esixente”. Nesti sen, cada escena espuesta escuende munchísimes hores de trabayu.

Les nueves edificaciones, que s'estrenen nesta esposición. | T. C.

Les edificaciones tán feches con una base de cartón reforzáu, que lleva enriba un emplastu d'escayola, serrín y cola, que va aplicando con ayuda d'una espátula. Anque empezó mercando un llibru con técniques d'ellaboración de nacimientos, considérase autodidacta y, colos años, foi creando la so propia técnica. Agora, en delles construcciones, emplega tamién poliestirenu espandíu, como nuna ruina qu'incorporó apocayá. “Voi un pocu por llibre”, añede.

Detalle d'una de les escenes con movimientu. | T. Cascudo

Doce díes-y llevó entamangar el so particular Nacimientu nel polideportivu santiseño. La primer vegada que lu amosó al públicu foi en 1991, en Navia y, la postrera, en L.luarca, en 2019. “Pero nun lu enseño tolos años, hubo temporaes qu'igual tuvo diez años ensin montase, pero yo nun dexo de facer coses. La verdá ye que disfruto más faciéndolu qu'enseñándolu, lo d'esplicalo cuéstame”, argumenta. Guárdalu nel sobráu de casa de so madre, en Veiga (Navia), onde tamién tien el so pequeñu taller, pero, confiesa que cada añu ye más difícil el montaxe y desmontaxe d'esta ciudá en miniatura. D'ehí que se ponga a disposición de los conceyos de la comarca p'atopar un llugar nel que sía posible amosalu d'un xeitu permanente. “Cuando la xente lu ve, abluca, quiciabes porque nun s'espera daqué de tanta calidá”, almite.