Los alumnos y profesores del colexu públicu Marcelo Gago d'Avilés presentaron esti día'l cuentu “¿Cuála ye la to historia?” que reflexa'l cursu tan “raru” que se vivió l'añu pasáu marcáu pola pandemia. Mesmo l'alumnáu que los maestros participaron na creación del llibru que recueye los dibuxos qu'ilustren les vivencies de los pequeños. Esti foi'l premiu del centru educativu a los neños pol so comportamientu exemplar mientres el pasáu cursu escolar.
La historia ta narrada por Marcela, un personaxe ficticiu que representa a los neños y neñes del colexu. Ella cuenta cómo foi la convivencia diaria col coronavirus nes aules, y que, sicasí-y diera un xiru radical al so vivir de cada día, nun resultó tan malu como lu pintaben.
El cuentu fíxose en collaboración con Ana Fran Pérez, que rexenta la llibrería avilesina “Cosas de familia”. “Comentamos nuna ocasión que sería bien guapo que los neños d'Avilés contaren les sos histories, depués llegó la pandemia y ehí vimos la posibilidá de sacar un llibru. Siempre ensin que fora con ánimu d'arriquecimientu, namás pa disfrutalo toos”, esplicó Ana Fran. “Ello ye que nun resultaron ser toes esperiencies negatives. Hai enforma positividá enforma na situación. Los neños diéronnos una llección importante”, añedió la llibrera.
Isabel Sainz, maestra de Pedagoxía Terapéutica, foi la encargada de coordinar la creación del llibru nel centru. La profesora señaló que “quixímos que fuera un trabayu inclusivu. Quien nun pudiera facer un dibuxu pos que punxera la so buelga. Con esta esperiencia queremos que los neños se sientan motivaos y amuesen interés pola llectura”.
“El covid camudó muncho la nuesa escuela. L'oxetivu del llibru ye demostrar que magar d'ello pudimos siguir faciendo munches coses nel colexu”, esplicó Rubén David, alumnu de 6.º de Primaria, quien foi l'encargáu de presentar l'eventu. La so compañera d'escenariu, Marina Robles, comentó que “siempre supimos ver el llau positivu na escuela”.
L'alcaldesa d'Avilés, Mariví Monteserín y la concejala d'educación, Nuria Demiro, asistieron a la presentación del llibru. “Toi encantada con esta iniciativa y voi facer que los llibros lleguen a les biblioteques d'Avilés”, comentó Mariví Monteserín. “Emocioné solo de ver l'entamu del llibru porque ye bien guapu ‘Un cole en el que todos cuidamos de todas y de todos’”, dixo l'alcaldesa.
Pela so parte, Nuria Delmiro quixo felicitar a los escolares pol llibru pero sobremanera por reflexar “el trabayu colos sentimientos. Ye mui importante enseñar a los neños a espresar les emociones”.
La obra ellaboróse por dafechu n'Avilés y ta dirixida a tolos públicu. Puede adquirise na llibrería “Cosas de familia” por 15 euros.
