Raquel Pire Fidalgo lleva siete años como entamadora rural al mandu del so negociu propiu en Muros, capital de Muros de Nalón y d'onde ye natural. Muyer con encantu, prestosa y atenta con una vecería que la conoz, como quien diz, dende neña, rexenta una tienda bien completa, con una distribución cuidada y elegante, onde ufierta dende lo último nel apartáu de llibrería y papelería, xunto a la prensa –ente la que nun falta LA NUEVA ESPAÑA– y revistes, mesmo que ropa d'última moda, oxetos de decoración y regalu, zapatos, bixutería ya inclusive productos de llimpieza . La so tienda, col nome de Mizoko, define bien el so conteníu, que ta costantemente anovando y incrementando.

Detalle de dellos productos pa neños na tienda de Raquel Pire. Ana Paz Paredes

La so hestoria como entamadora va amestada a Muros, d'onde la so familia ye natural y d'onde nunca quixo marchar. “Yo empecé nesto cuando'l dueñu del qu'entós tenía una llibrería contratóme pa recepcionar los periódicos pela mañana. Cuando se xubiló ufiertómela a mí y decidí poneme pola mio cuenta. Yera un local mui pequeñín y, depués de trés años y pola neciura de los mios amigos, acabé garrando'l local onde toi güei, más ampliu, y onde puedo ufiertar un poco de too. Y ye que, como ves, intentando que cada cosa tenga'l so llugar, equí tengo papelería, llibrería, droguería, cacía pal llar, ropa, zapatería, xuegos infantiles, bixutería y artesanía de lo más variao”, esplica ella non ensin cierta pasión polo que fai y onde lo fai: el so pueblu natal, Muros. 

De siguío añede que “nun me puedo quexar, vame bien, pero tamién ye verdá qu'equí a los mios padres quiérenlos muncho y yo soi, pa munchos vecinos, Raquelina. Al ser d'equí de tola vida y conociéndote bien, como a los mios hermanos, la verdá que ye un puntu al mio favor. Amás de que al mí préstame escuchar a la xente y, si puedo ayudar no que faiga falta, fáigolo”, esplica con una sorrisa.

Raquel Pire tres el mostrador de la so tienda en Muros. Ana Paz Paredes

Al tiempu que viende los sos productos tamién recueye trabayos d'arreglu de calzao, o d'arreglos de ropa ya inclusive de la tintorería. “Amás de contar con servicios de mensaxería y paquetería como UPS y MRW, la xente trai tamién por cuenta d'ellos zapatos o ropa pa iguar y vien a recoyelo una vegada a la selmana una zapatera d'Avilés, dos costureres y tamién de la tintorería. Inclusive hai vegaes que me dexen paquetes equí pa dalgún vecín cuando nun ta en casa”, recuerda Raquel Pire, que gusta del tratu coles persones y, sobremanera, escuchales.

Bolsos, bixutería, ropa y colonies, nel interior de la tienda de la entamadora de Muros. Ana Paz Paredes

“Yo equí escucho a tol mundu. Que la xente confíe en ti ye bien importante. Nun sé, dacuando pienso que tendría qu'estudiar Psicoloxía”, bromia. Cree que puede entamase y vivir nel mediu rural y más agora, tres lo vivío cola pandemia. Asina destaca que “cada vez hai más xente que ta convirtiendo lo qu'equí teníen como segunda vivienda en primera. Vese claramente nel colexu, onde aumentó d'un xeitu importante'l númberu de neños. Tamién se ta construyendo muncho na zona”, recuerda.

Raquel Pire tien por ún de los últimos llibros aportaos a la sección de llibrería de la so tienda, en Muros. Ana Paz Paredes

El so únicu día de descansu ye cuando viaxa a Uviéu a la busca de nuevos productos y d'aquellos que-y pide la vecería. “Yo siempre digo que tengo de too y, si nun lo tengo, consigolo. Hasta un productu bien concretu de llimpieza pa les chapes de les cocines antigües, por ponete un exemplu ente tantos”, destaca esta entamadora rural.

Esterior de la tienda de Raquel Pire, frente por frente a la ilesia local, en Muros. Ana Paz Paredes

Sicasí, un conseyu: “Puede entamase y vivir nel mediu rural pero claro, dedicándo-y muncho tiempu y esfuerzu, que de primeres a munches coses nun-yos saques rentabilidá, tolo contrario, pero tienes qu'engardite y aneciar, siguir alantre acaldía hasta llograr los beneficios qu'escuerres, que pa eso abres un negociu. Per otru llau, al mi préstame lo que faigo y vivir au vivo”, afirma. La bona marcha de la so tienda valió-y pa crear, apocayá, un puestu de trabayu y dende'l pasáu mes de mayu tien una emplegada con sobrada esperiencia nel sector.