Antipsicóticos inyectables, un siguimientu multidisciplinar y, sobremanera, xestión de casos –personal d'enfermería al cargu de los pacientes–. Esta ye la fórmula d'un innovador proyectu de prevención de suicidios en persones con esquizofrenia. Los resultaos d'esta investigación, liderada por personal d'enfermería del Centru de Tratamientu Integral (CTI) Montevil, son más que favoratibles: les tentatives de suicidiu en persones con diagnósticu d'enfermedá mental grave amenorgaron nun 80 por cientu. L'estudiu siguió a lo llargo d'una década a 344 persones, tolos ingresos con diagnósticu d'enfermedá mental grave ente 2004 y 2018. 

“Los resultaos fueron mui satisfactorios y rescamplen la eficacia de la xestión de casos”, apunta Silvia Díaz-Fernández. Ella ye una de les enfermeres qu'encabezó la investigación “Intentos de suicidiu en persones con esquizofrenia enantes y depués de participar nun programa comuñal intensivu con manexu de casos; un siguimientu de venti años”, yá publicada y apocayá galardonada nos XXXI Premios d'Innovación ya Investigación de la área sanitaria de Xixón (nomada área sanitaria V). Tamién Danny Francisco-Frías Ortoza y Juan José Fernández-Miranda. Silvia Díaz-Fernández esplicó que “el siguimientu de los pacientes foi de diez años dende'l so ingresu en Montevil, pero reculemos otra década al traviés de los historiales. Asina que cada casu síguese a lo llargo de venti años”. Amás de la xestión de casos, recalca'l siguimientu multidisciplinar: “Participaron profesionales sanitarios de distintes árees pa consiguir un abordaxe más completu que n'otros tratamientos”. 

Yera una investigación pernecesaria. Porque, tal que recueye l'estudiu del personal d'enfermería de Montevil, el riesgu de suicidiu multiplícase por ocho ente los pacientes d'esquizofrenia. Ente'l 20 y el 50 per cientu de los diagnosticaos tienen historial de tentativa. Na mayoría de los casos, rexístrense nos diez primeros años tres el diagnósticu. Hasta'l 50 per cientu nos primeros dos años. “El sofitu social ye importante”, apunten nel estudiu. 

Anque lo primero ye l'atención sanitaria. La media d'edá de los pacientes, na investigación de Montevil, foi de 43 años y el 63 por cientu yeren homes. “Esti programa enconta nos principios del cuidáu comuñal, con una xestión de casos intensiva”, destaquen. Cada enfermera siguió a un total de venti pacientes. Amás de la intervención multidisciplinar, el personal d'enfermería afaló “la integración de los pacientes na comunidá, apurriendo tratamientu, rehabilitación y sofitu”. Tocantes a la farmacoloxía, los antipsicóticos inyectables demostraron ser más eficaces que los tratamientos orales. 

Falen los datos. Esti abordaxe consiguió una adherencia muncho más alta: solo 42 pacientes abandonaron voluntariamente, frente a los 290 que lo fixeron enantes en tratamientos estándar. Les tentatives de suicidiu amenorgaron, en cifres redondes, de 134 a 26. L'estudiu, eso sí, “básase namás en persones con un diagnósticu previu d'enfermedá mental grave, polo que nun puede ser treslladáu a la población xeneral”.