El robot camareru, de práctiques n'Uviéu: una arrocería incorpora a la so plantiya a un androide

De Hong Kong a sirvir platos na Ruta de los Vinos. El primer robot camareru d'Asturies tien cara de gatu, muévese a una velocidá d'un metru per segundu, celebra que-y tasquen les oreyes, últimamente canta villancicos y puede cargar hasta ocho raciones en caún de los paseos que pega pel local. El so nome, a falta de que lu rebauticen, ye Bellabot y ta de práctiques nun restauránte d'Uviéu. 

El so dueñu, Francisco Cembrano, asemeya al camareru robóticu que xunta los dos mundos: la hostelería y l'informática. Tien una arrocería y la empresa Ástur Robotics, qu'importa la nueva mano d'obra venida d'Asia, col enfotu de vendela en Asturies entera. Como ye natural, el primer robot n'aportar ta probándolu nel so restaurante. L'empresariu esplica que'l funcionamientu del robot ye cenciellu. Bellabot analiza'l local y la disposición de les meses y percorrelu ensin problemes col enfotu d'ayudar al personal a repartir los platos. Ye como una Roomba –les conocíes aspiradores intelixentes– que s'afaya a la hostelería.

El robot sal d'un puntu averáu a la cocina, onde ún de los camareros asitia los platos nes bandexes que tien como cuerpu, y na interfaz márquense les meses a les que tien qu'empobinar la comida. De camín va poniendo música y anuncia la so llegada con un “yá toi equí” de la que s'alluma d'azul la bandexa que correspuende a la mesa. Los comensales pueden recoyer la comida ellos mesmos o que sía un camareru'l que coloque'l platu frente al comensal. Si'l resultáu ye bonu, l'empresariu piensa en quedar con Bellabot cuando termine'l so periodu de prebes o, inclusive, traer dalgún otru modelu. 

Cembrano asegura que la “contratación” del robot nun significa que vaiga despidir a nengún de los camareros de la so arrocería. A cencielles, indica, “ye'l progresu”. Lo mesmo, diz, que cuando mercó un fregaplatos va décades. Agora, quier esportar un productu que, diz, solo vio n'otros dos restaurantes en toa España. Ún d'ellos ta en Madrid y l'otru en Pamplona. Agora ta axustando pa vender un nuevu robot en La Coruña. El preciu, anguaño, ye eleváu y asciende a los 12.000 euros. 

Pel momento, Bellabot fíxose coles redes sociales y convirtióse nun reclamu pa los veceros que-y saquen semeyes y pásenlo bien coles coses que diz el robot cuando interactúes con él. 

Nel mercáu hai otros modelos de robots camareros, caún con un grau de complexidá distintu. Hasta agora, diz el dueñu de la empresa Ástur Robotics, la mayoría d'ellos tán n'Asia pero, a poco y a poco, van faciéndose sitiu nel mercáu européu. Agora, na Ruta de los Vinos la comida sirvela un ordenador.