Si a daquién-y falen de minería espacial, de xuru qu'una de les primeres imaxes que se-y vengan a la cabeza serán les de la película “Armageddon”, con Bruce Willis y el so equipu d'afuracadores tratando de salvar la tierra faciendo una galería nun asteroide xigante. Pel momento, nun se tuvo que llegar a esi estremu, pero dende Asturies yá se ta investigando nel campu de la minería y enerxía espacial. Hunosa y la Universidá d'Uviéu son les entidaes qu'apostaron por ello con un conveniu, pel momento modestu, que trai una inversión de 17.500 euros añales.
El Boletín Oficial del Principáu d'Asturies (BOPA) publicaba esti día un conveniu ente l'ICTEA (Institutu Universitariu de Ciencies y Tecnoloxíes Espaciales d'Asturies) y la hullera pública pa entamar un plan d'actuación que va traer, ente otres acciones, la “investigación na identificación y potencial d'esplotación de los recursos minerales espaciales”. Amás, esti conveniu permitiría “contribuyir a la meyora de la conocencia práctica y la capacidá investigadora con cuenta de facilitar l'accesu al mundu llaboral rellacionáu cola minería espacial” pa los universitarios, al empar que fomentaría'l reciclaxe del personal d'Hunosa hacia esti nuevu campu por pescudar. Tamién se busca la “collaboración en planes de formación d'ámbitu interrexonal o internacional en materia minero, enerxético y actividaes allegaes nel ámbitu espacial”.
El conveniu publicáu esti día ente empresa y Universidá trai la convocatoria d'un premiu “Hunosa” al trabayu fin d'estudios rellacionáu coles tecnoloxíes mineres espaciales y la identificación de recursos enerxéticos fuera de l'atmósfera terrestre.
La minería espacial ye anguaño una gran desconocida, una actividá incipiente. El conceutu tomó relevancia nel últimu tramu de la presidencia de Barack Obama n'EE UU, cuando robló una “Llei del Espaciu” na que facía referencia a esa posibilidá. Lo que vieno regular esta llei ye'l permisu pa que particulares o empreses americanes pudieren apoderase de material espacial, siempre que tuvieren la tecnoloxía pa ello. Esto ye, que si una empresa puede llegar a un asteroide, y tener la capacidá de llograr recursos del mesmu tales como agua, fierro, o metales preciosos va poder beneficiase d'ellos. La Llei roblada por Obama especifica qu'esos recursos van poder ser “teníos, tresportaos, usaos o vendíos”. Daqué asemeyao a llevar la llei del derechu marítimu fuera de l'atmósfera terrestre.
Y nel estudiu d'estos asteroides ye onde s'alluga'l conveniu ente Hunosa y l'ICTEA. L'Institutu promueve delles investigaciones. Busca planetaria y cosmoloxía o xeoloxía planetaria son tamién llínies nes que se trabaya dende la Universidá d'Uviéu, amás de na “detección y caracterización de recursos minerales y enerxéticos estraterráqueos con mires a la so posterior esplotación”, que ye no qu'Hunosa tamién participa. Y tou ello so la supervisión de Javier de Cos, director del Institutu
Proyectos
La Universidá d'Uviéu amosó la so fuerte vinculación a estos proyectos con un proyectu recién xunto a la NASA, l'axencia espacial americana. Foi na Escuela de Marina Civil, en Xixón, onde va un par de meses instaláronse 22 telescopios pa observar la redolada del planeta Xúpiter. L'oxetivu yera observar la forma y el tamañu d'unos asteroides que la so composición podría ser la mesma que los planetes esteriores del sistema solar. Queda agora por ver si lo qu'empezó con esa observación n'Asturies, va rematar cola esplotación de recursos d'ún d'esos asteroides nel espaciu.
