La Sociedá de Pescadores Las Mestas del Narcea fai estos díes la frega de los salmones del centru ictioxénicu de Quintana, en Pravia, que van sirvir como esguirrios pa la repoblación de los ríos. Los miembros del colectivu tán esmolecíos cola frega (desove) xabaz qu'observen nel Narcea y los sos afluentes, porque, por mor del control de les llámines d'agua nel aprovechamientu hidroeléctricu del embalse de Soutu Barca (Tinéu), baxó'l nivel del ríu, dexando ensin agua y al aire los puntos de frega de la especie. La situación púnxose en conocimientu de la Dirección Xeneral de Mediu Natural y Planificación Rural. 

“Tendría que se tener consideración nesta dómina de frega pa nun baxar tanto'l nivel del ríu, porque la frega queda en seco y lo que nun puede ser ye que llevemos un mes col mesmu nivel. De casualidá, cuando baxa'l megavatiu/hora baxa tamién el nivel del ríu a menos d'un metru d'altor”, señala'l presidente de Las Mestas del Narcea, Enrique Berrocal

Los pescadores tán asustaos cola situación, que se produció va dos fines de selmana, visto'l riesgu que supon pa la viabilidá de la especie. Más entá cuando nel últimu mes alvirtieron munches entraes de salmones a desovar mesmo nel Narcea como nos sos afluentes, con especial atención al Nonaya en Salas. “Tienen que tenelo en cuenta”, insiste Berrocal, quien diz que la cuenca fluvial del Narcea “yá sufre agresiones abondo como pa que tamién lu afecten les variaciones nel preciu de la lluz”.

El presidente de Las Mestas del Narcea, Enrique Berrocal, a puntu de pesar parte de les güeves desovaes esti día en Quintana. | S. Arias Sara Arias

Según espliquen los pescadores, la baxada d'agua supon la muerte de les güeves que los salmones dexen nel fondu del ríu pa la so posterior eclosión, por cuenta de la falta d'agua y un escesu d'osíxenu. “Pola esperiencia que tenemos equí, cuando facemos la frega, si dexes diez segundos un bastidor ensin agua, mañana atopes les güeves muertes”, detallen. 

El mimu col que se realiza la frega en ciclu zarráu ye máximu. L'otru llunes sacaron un total de seis kilos de güeva con cinco femes, de los que dos kilos y mediu consiguiéronse con exemplares selvaxes del proyectu “Arca”, nel que los pescadores donen en vivu les captures pela temporada de pesca tradicional pa la so integración nel centru ictioxénicu de Quintana como sementales. 

Esti 2021, tienen un total de diez salmones, más otru que recuperaron del añu pasáu. Amás, tienen 16 exemplares donaos pola Conseyería de Mediu Rural pa efectuar les repoblaciones. “Tamos en plenu apoxéu porque esta ye la dómina de mayor actividá”, destaca Berrocal. Ye un trabayu que realicen p'aportar población salmonera al ríu y, por eso mesmo, llamenten fondamente la perda de delles zones de frega. “Ye qu'asina nun podemos sacar el salmón alantre”, conclúi'l pescador.