El Centru Niemeyer propón pa esti añu qu'entra un calendariu d'esposiciones que viaxa de la “Movida” madrilana al mundu hippy de San Francisco. Per un llau, una antolóxica del músicu y artista Carlos Berlanga, l'autor de cantares tan preclaros como “A quién le importa”. Y, per otru, una retrospectiva del diseñador Víctor Moscoso o parte de les obres de la postrera biañal de Sâo Paulo. Esto ye, punk de la Transición, modernidá a lo Rafael Canogar, Antoni Tàpies o Jorge Oteiza pa terminar cola rabasera del arte urbano nos Estaos Xuníos a manos d'un gallegu.
L'antolóxica sobre Berlanga titúlase “El eterno retorno” y ye obra del artista, lletrista y xestor cultural Pablo Sycet. La so inauguración oficial va ser el vienres 21 de xineru. La mayor parte de les obres que van amosase na cúpula vienen de los fondos de la Fundación Olontia.
El calendariu espositivu –los responsables del Niemeyer llámenlu “refuerzu” de la so programación espositiva– complétase con un artista que se fixo grande nel “Branu del Amor”, el de 1967. El coruñés desiguó el cartelismu de tal xeitu que dio forma al “underground” de la California de los sesenta y setenta y los “Talking Heads” escoyéronlu por que diseñara dalgún de los sos discos.
Moscoso tien obra nel Louvre, en París, o nel Victoria and Albert, de Londres. La retrospectiva entámala David Carballal y va concidir nel espaciu –na cúpula– y nel tiempu –ente marzu y xunu– cola de Carlos Berlanga, que va incluyir tamién pieces de les colecciones privaes de Pedro Almódovar o d'Alaska, la voz de les sos lletres más llexendaries.
El rompecabeces d'esposiciones pal primer semestre d'esti añu complétalu la esposición colectiva “We are family! (¡Somos familia!)”: siete ensayos visuales d'otros tantos fotógrafos estranxeros que busca rindir homenaxe a una de les esposiciones más esitoses de la hestoria de la fotografía: “The Family of Man”.
Pablo Berástegui ye'l responsable d'esta amuesa que va tar nel foyer del auditoriu ente los díes 11 de febreru hasta'l 29 de mayu. Nella axúntense obres d'Elena Anosova (Rusia, 1983), Luis Cobelo (Venezuela, 1970), Andrea Gjetvang (Noruega, 1981), Lionel Jusseret (Bélxica, 1989), Kovi Konowiecki (Estaos Xuníos, 1992), Bharat Sikka (India, 1973) y Juan Valbuena (España, 1973).
