Imaxine que ta sentáu en sofá y que-y entra antoxu de pizza. Agora, imaxine que s'avera a una impresora 3D, inxier un cartuchu asemeyáu a los de la tinta y nunos minutos tien fecha la comida, que, amás, ye probiótica. Suena a ciencia ficción, pero nun lo ye. Xulio González, un inventor asturianu afincáu en Vigo dende va cuatro décades, acaba de patentar esta idea tan ocurrente. Tienlo bien claro, "el futuru ye pa los que s'afayen al cambéu" y por eso, propón una dieta alternativa a los que carecen de problemes intestinales, anque según afirma, puede disfrutala cualesquier que quiera comer sano. “Esto nun ye como nel pasáu, dos más dos yá nun son cuatro, la evolución nun tien riegles pa salir alantre. Yá nun se trata de dineru o capacidá intelectual, sinón d'adaptación a les nueves redolaes rellacionaes col día a día”, afirma esti visionariu. 

Xulio nació n'Uviéu, anque nun diz l'añu esactu, porque según asegura casi nin les sos fíes conocen la so edá. "Nun crezo porque toi tol día investigando", bromia. Empezó a discurrir inventos a una edá bien temprana, cuando la falta de suañu lu llevó a dormir mui poques hores, de cinco a siete de la mañana, tal como esplica, y esto llevólu a invertir esi tiempu en dexar volar la imaxinación y formase en distintes árees. Ye llicenciáu n'inxeniería electrónica y mecánica. Marchó pa Vigo pa entamar un proyectu, qu'en resultando un ésitu obligólu a asitiar de forma permanente: una báscula que funcionaba con exactitú a bordu de los barcos. Esti mecanismu pa pesar oxetos na inestabilidá d'alta mar catapultólu a la fama en 1985 y sirvió-y como motivación pa siguir alantre. "Dicíenme qu'aquello taba a años lluz, naide creía nello. Falamos d'una dómina na que nun había Internet y los esperimentos facíense a machete", cuenta Xulio. Magar esti ésitu y la so nueva vida en tierres gallegues, insiste delles vegaes a lo llargo la so conversación con LA NUEVA ESPAÑA, en qu'el so corazón sigue siendo carbayón y allá onde va, que fueron munchos llugares, promociona la sidra y les bones costumes asturianes.

Gracies al focu mediáticu que consiguió col so preséu marín, fundó'l grupu Teaxul y siguió patente tres patente, proyectu tres proyectu, hasta llegar a la dietética del futuru. "Esti procesu empezó porque me retaron", esplica l'inventor, yá qu'asegura que cuando-y dicen que nun ye quien a facer daqué invierte'l doble d'esfuerzu. Encerriscóse nél en 2019 xunto a Oanxus, un centru d'investigación multidisciplinar de nueva creación allugáu en Vigo, y por fin puede presentar los frutos llograos, que consiguieron financiación d'ICEX. La idea ye qu'en casi tolos llares, al igual qu'hai una Thermomix, les families dispongan de la so propia impresora 3D a un preciu razonable, onde puedan introducir estos preparaos alimenticios y cuidar la so flora intestinal. "Comes y al tiempu tas curando", asegura Xulio. Y esplica: "Esta tecnoloxía permite desenvolver la personalización d'alimentos ya incluyir nellos molécules funcionales". Nesti casu prebióticos y probióticos, anque ye solo'l principiu. El científicu quier apostar pola iniciativa con calma, pa nun ver "les coses como un negociu primero del so tiempu", pero asegura que d'equí puede caminase a un métodu d'alimentación distintu, afechu a les necesidaes de cada usuariu. 

Pa los que dulden de la naturalidá d'estos productos que consten de distintos ingredientes pa poder escoyer ente una cuatro quesos o una pepperoni, asegura que tán homologaos y provienen del campu: "Muncho meyor que los trexénicos, quién va creer qu'una fruta ensin pebíes ye daqué de la madre tierra". Visto que se considera un gran defensor de la comida sana y el primer esmolecíu por esta materia. Y tou ello testao primeramente nun llaboratoriu por aciu d'un minuciosu llabor pa conocer qué cantidá de microbiota intestinal fai falta según los gramos que se pon a cada cocináu. 

De la mesma, l'inxenieru esclaria que nun busca facer nengún tipu de competencia a les pizzerías o establecimientos de comida rápida, el primer proyectu siguió esta llínia pero solo ye la forma que tomó, yá que facía falta entamar por dalguna gama de productos específica: "Ye un nivel distintu, llamámosla pizza porque ye lo que se va 'dibuxar', pero nin el procesu pa llograr el resultáu nin los componentes son lo mesmo. Empezamos con esto porque facíanos falta daqué concreto pa facer les prebes definitives, pa calcular cantidaes...". Y insiste: "Hai xente que necesita de toes toes una alimentación determinao, eso queremos da-y. Anque ye daqué que puede disfrutar tol mundu y resulta beneficioso". Él albidra que dientro d'unos años les sociedaes van poder programar estes impresores pa que-yos faigan una hamburguesa o un pexe, tecnoloxía punta a la carta.

Anque nun lo paeza l'asturianu nun ye un gran amante de la intelixencia artificial nin de les nueves tecnoloxíes, ello ye que cree que'l ser humanu ye imprescindible y les maquinas nun tienen sabiduría o intuición. "Si siguimos asina los meyores amigos de los neños van ser robots y eso ye esmolecedor", declara. Ye un apasionáu de la creatividá y la modernidá, asina ye como se define, que s'afaya a la globalización y busca soluciones p'ameyorar el día a día de les persones. Eso llevólu a ganar cuatro premios europeos en materia de salú y medioambiente, mesmo qu'embarcase n'investigaciones de toles tintes. Eso fai que nunca cese la so formación ya invierta eses 22 hores que permanez en vixilia a siguir estudiando. 

 "Creo na autosuficiencia de la xente, eso ye lo que plantego nes mios idees", diz l'uvieín, qu'apuesta fuerte pola implantación de sistemes que doten a la sociedá de ferramientes pal desarrollu global. Dica agora, l'autonomía nun se patenta, pero les pizzes probiótiques pa imprimir al estilu caseru sí.