L'Asturies vacía viéndese. Y a mui bon preciu. Por menos de la metá de lo que cuesta un pisu nuevu n'Uviéu, Xixón o Avilés puede mercase una aldea con trés o cuatro construcciones, dellos miles de metros cuadraos de terrén, vistes panorámiques y bona señal de móvil. “Tán de moda”, afirmen los espertos del sector inmobiliariu, sobre un tipu de compres que güei, nesti mundu nel que tolo que ta alloñao de les aglomeraciones cotiza a l'alza, busquen profesionales que pueden teletrabajar tol añu y persones que pretenden un retiru arrodiáu de naturaleza y tranquilidá.

Anguaño, n'Asturies hai poco más d'una docena d'aldees en venta. Los precios van de los 69.000 a los 2 millones d'euros. La más barata ye una propiedá con delles edificaciones, horru, bodega y finca de casi 20.000 metros cuadraos. Talu qu'especifica l'anunciu, asitia nuna zona que ye reserva de la bioesfera, con espacios pa disfrutar de la caza y la pesca. Amás, tien servicios d'alcantarelláu, agua y lluz al pie de la propiedá y dispon de bona señal de telefonía móvil. Cuesta 69.855 euros.

La más esclusiva, de casi 2.160.000 euros, tien 770 hectárees. Talu que reza l'anunciu de venta, tien 14 cases, cortes, ilesia y campusantu, anque los edificios episcopales nun entren na operación. Ta arrodiada de pinos, ablanos, carbayos y fresnos nos qu'habiten urogallos, osos pardos y águiles reales. Rescamplen, amás, que ye una zona especialmente favorable pa la práctica del senderismu y l'esquí de travesía.

En nengún de los dos anuncios, nin de los otros doce a la venta, ta l'allugamientu esactu de les aldees. “Faese exprofeso por deséu de los sos propietarios. Suelen ser mui celosos cola intimidá”, esplica Elvira Fafián, xerente de Aldeasabandonadas.com, una de les empreses referencia a nivel nacional na venta d'esti tipu de propiedaes. 

Magar que nun se concreten allugamientos, Fafián sí reconoz que la inmensa mayoría d'elles atópense nes nales del Principáu. Especialmente na occidental. “Polo xeneral son propiedaes que pertenecen a dellos herederos. Nel so día fueron zones onde vivíen dellos miembros d'una mesma familia y que, col abandonu de los pueblos, quedaron ermes dafechu. Para da-yos una salida, pónenles a la venta”, detalla la empresaria, con 14 años d'esperiencia na venta de pueblos.

Una casa nuna de les aldees a la venta n'Asturies

Anque pueda abultar una tochura, mercar una aldea ta güei de moda. Especialmente tres la pandemia. “El perfil de comprador que tenemos ye xente que se puede permitir teletrabayar tol añu, como arquitectos o inxenieros; inmigrantes o dalgunos de los sos descendientes, que busquen tornar a los so raigaños y fáenlo con dineru; o entamadores que pretenden montar un negociu de turismu rural”, rellata Fafián, quien afirma que nos últimos meses nun dexó de sona-y el móvil: "Recibimos más d'un centenar de llamaes de xente interesao en mercar un pueblu n'España".

La empresa de Fafián viende aldees en tol país. Eso sí, reconoz que les zones más demandaes son Galicia y Asturies. “Gusta muncho'l paisaxe, les sableres y los montes; el tipu de construcciones, que suelen ser de piedra; y una población qu'acueye bien a los de fuera”, fae l'axente inmobiliaria, que tamién asegura que tres la venta d'aldees faen un siguimientu de seis meses a los compradores: “Esmolecémonos de que too tea bien y de que s'afayen correchamente a la zona. Tuvimos casos de xente que se quexa del ruiu de les vaques en mercando”.

Una aldea en Taramundi pa retirase

Tres años de busca per tol norte peninsular, Paco Belmonte mercó fai un poco más de dos años una aldea en Taramundi. Esti almeriense de 54 años, que se dedica a la venta de productos ecolóxicos, atopó nel epicentru de l'Asturies que se desangra demográficamente lo que llevaba una década buscando: una zona con delles construcciones, pa dedicar una d'elles a vivienda y tener la posibilidá d'esplotar el restu como agospiamientos rurales; y terrén abondo pa semar. “Quería daqué mui tranquilo y un poco separao. Ellí nun veo a naide nin tengo a naide que me vea, pero tampoco toi incomunicáu. Tengo Taramundi a 10 kilómetros”, cuenta Belmonte, pa quien l'afayu “foi como atopar el Santu Grial”.

L'almeriense mercó la so aldea por una cifra que nun concreta pero que foi inferior a los 100.000 euros. “Agora, cola situación actual, yá nun hai nada como lo que yo consiguí”, asegura pola esperiencia que-y dieron los so diez años peñerando'l mercáu n'Asturies, Galicia y Cantabria.

Una casa nuna de les aldees a la venta n'Asturies.

La intención de Belmonte ye adelantar la so xubilación y retirase en Taramundi. “Vivir d'un xeitu autosuficiente”, resume l'empresariu. Pel momento, afirma, va siguir aprovechando cualquier buecu na so axenda pa percorrer les 11 hores de viaxe que dixebren Almería de Taramundi y siguir trabayando en poner a puntu unes viviendes qu'hasta la so llegada taben condergaes a una muerte lenta a manos del mugor y les goteres. “Si va too bien y lo económico lo permite, espero tar viviendo ellí en dos años”, sentencia Belmonte, quien atopó na Asturies erma'l proyectu que lu enllena de vida.