Uviéu encaraba, nos últimos años del sieglu XIX y les primeres décades del XX, un procesu de tresformación urbana qu'acabaría granando na ciudá que güei conocemos. Una evolución qu'Ángel Mato radiografía nel so llibru “Puro Oviedo. Oviedo hace 100 años” (Nortegráfica), crónica gráfica d'esa tresformación urbana na que l'autor s'enconta en más de 400 fotografíes procedentes del Muséu del Pueblu d’Asturies y del Archivu Municipal d'Uviéu, gran parte d'elles inédites. 

Mato esplica que les bases de la crecedera urbana que la ciudá va esperimentar neses primeres décades del sieglu XX pónense yá nel XIX, con dos decisiones que considera claves pa esplicar esa evolución: “La primera foi dixebrar la estación de tren del Antiguu, continuación de la exa Fruela-Uría, y la segunda ye la desamortización, que favorez a la ciudá porque tolos conventos van acabar acoyendo actividaes que son bones pa la ciudá”. Esti segundu hastial, Mato ejemplifícalu col casu de San Francisco, que nel so solar edificóse la Diputación, convirtiéndose la so parcela nel Campu, “un pulmón urbanu nel centru qu'emparenta a Uviéu con grandes ciudaes como Nueva York o Madrid”, esplica Mato. 

Anque Mato entama'l so ensayu con tol rigor científico, nel volume nótase la pretensión, mesmo del autor que de la editorial, por construyir un llibru interesante y accesible, qu'entre pelos güeyos, y que permita tamién una aproximamientu más reposáu, un güeyar calmu en momentos de distensión. Mato allega hasta un conceutu en puxanza pa esplicar esta pretensión: la de los “Coffee Table Books”, llibros visualmente formosos, editaos con gustu y cuidáu, que tean a la vista pa que'l propietariu o los sos invitaos puedan aportar a ellos en momentos de relax. 

L'Antiguu, los mercaos, l'enanche, la redolada, los tresportes, les fiestes y la práctica deportiva son dalgunos de los aspeutos que Mato va analizando nel volume, siempre col sofitu d'un aparatu gráficu pimpanudu, construyendo un gran frescu d'esa capital qu'aprendía a ser ciudá. Fuxe, eso sí, de los acontecimientos traumáticos de 1934 y de la Guerra Civil. Trátase d'amosar la evolución urbana natural de la urbe. 

Esto nun quier dicir que l'historiador nun enseñe decisiones revesoses, o les sos consecuencies. Ensin dir más allá, apara na creación de la plaza de la Catedral, que traxo la demolición d'una mazana entera de viviendes, una solución que tuvo defensores y detractores, y que sía que non camudó de forma decisiva la naturaleza d'esa parte de la ciudá.