La pandemia fundió a niveles inéditos nesti sieglu la emancipación de los mozos asturianos y dexólos trancaos en casa de sos padres, ensin apenes posibilidaes d'echar el vuelu por llibre. L'últimu informe del Conseyu de la Mocedá d'España pon-y cifres a esti problema. Nin siquier dos de cada diez rapazos de la rexón –menores de 29– vive independizáu (son el 13,9%), un porcentaxe per debaxo del que se rexistra nel conxuntu del país (14,9), tamién inusualmente baxu. Ye, señala l'estudiu, “la tasa d'emancipación más baxa d'esti sieglu”. Nel casu concretu del Principáu, l'organismu asegura que la culpa d'esta perbaxa independencia xuvenil tiénenla les dificultaes qu'estos tienen pa enganchar al mercáu llaboral nunes mínimes condiciones de calidá. 

El presidente del conseyu de la Mocedá d'Asturies, Álvaro Granda, pon l'acentu nes elevaes tases de temporalidá llaboral que tienen los mozos asturianos. “Les nueses condiciones d'accesu al mercáu llaboral son llacerioses”, resalta. El 57% de los mozos solo consigue un contratu temporal. Nada fixo.

Entrando más al detalle, solo'l 13,9% de los asturianos de menos de 30 años vivía fuera de la casa de sos padres nel primer semestre de 2021, el periodu qu'analiza l'estudiu. El problema ye la sucesión de crisis que tán sufriendo les nueves xeneraciones dende 2008 hasta agora. Esi ye, cuandu menos, l'analís del Conseyu de la Mocedá d'España: “Si la gran crisis económica yá torgó d'un xeitu permanente les trayectories vitales de toa una xeneración, la crisis de 2020, agravada pola pandemia, ta teniendo unos efectos inclusive peores, cuidao que les persones moces que los sufren alcuentren nuna situación de partida más precaria que la de la xeneración que los precedió”.

Como la pixota que se muerde la cola, los mozos asturianos nun llogren aportar –o lo tienen bien difícil– a empleos estables colos que encalzar la so vida y, poro, tampoco pueden independizase de la casa de sos padres. Y eso qu'últimamente les tases de desempléu xuvenil tán apangando daqué. Los mesmos datos arrexuntaos nel informe del Conseyu de la Mocedá señalen a los mozos asturianos como aquellos que tienen un mayor porcentaxe de contratos a tiempu parcial –por solo unes hores– y, poro, los que menos empléu a xornada completa tienen del país. Evidentemente, eso provoca que los sos ingresos sían tamién menores.

Hai datos esmolecedores. Por exemplu, Asturies ye la comunidá na que la tasa d'actividá de los mozos (un porcentaxe que recueye mesmo a aquellos que tán trabayando como los que busquen un empléu de forma activa) ye la más baxa del país. Del 45,2%. Y eso que la tasa de paru (28,8) foi baxando. Sicasí, l'informe apunta que “en comparanza col restu de comunidaes, l'accesu a una vivienda por parte de los mozos ye más económicu (porque los precios son más baxos)”. Con too y con ello tamién apunta qu'encarar el pagu d'una hipoteca por parte de los mozos asturianos con trabayu resulta “poco facedero”, por cuenta de los salarios. El conseyu destaca que los mozos de la rexón sufren una peralta tasa de temporalidá llaboral, del 57%. 

Con esti panorama, Álvaro Granda asegura que ye “necesaria una política de mocedá integral, que facilite l'accesu al mercáu llaboral y a la vivienda, porque somos un colectivu con unes necesidaes mui específiques”. Una solución que-y entra pelos güeyos ye'l bonu xoven incluyíu dientro de la nueva llei de vivienda apautada ente los dos socios del Gobiernu nacional (PSOE y Podemos), pero la tramitación d'esta ayuda ta desesperando los ánimos de los más mozos. Va unos díes el Gobiernu aseguró que la subvención va aprobase “nunes selmanes”. La idea inicial del Executivu yera qu'esta ayuda al arriendu –de 250 euros mensuales– tuviera vixente dende empiezos del añu, sicasí, inda falten por llimar dalgunos detalles sobre cómo se va a aplicar. Eso sí, la partida yá ta incluyida dientro de los presupuestos xenerales del Estáu pa esti 2022 con una dotación económica de 200 millones.