La hestoria de la última fiebre inversora empezó fai unos trés años con unes ilustraciones de gatinos amarutaos. Llegaron a pagase miles d'euros per caún de los cien primeros. ¿Por qué? Yeren esclusivos y caún d'ellos venía acompañáu d'un certificáu –basáu na mesma tecnoloxía sobre la que se sofiten les criptomonedas, el “blockchain” o cadena de bloques– qu'aseguraba que nun se diben replicar. Dempués de los gatinos llegaron una especie de cromos virtuales de xugadores de la NBA (la lliga de baloncestu americano) que batieron récords de venta. Y la fiebre aumentó de temperatura. Per tol mundu, tamién n'Asturies. “Equí empieza a esistir ciertu interés por estos productos y tien traza de que va siguir a l'alza y más entá si les criptomonedes siguen garrando puxu”, señala Rubén Vilela, “broker” asturianu. 

Les NFT (sigles del términu inglés token non fungible) –qu'asina se llama a esta especie d'obres d'arte dixital– y que se puyen en páxines especializaes por precios astronómicos tán calando con tanta fuerza qu'hasta los espertos nos mercaos financieros tán ablucaos del so ésitu. Tanto como de la so utilidá práctica. “Ye sorprendente”, reconoz l'asturianu Daniel Díez García, director d'annovación de la consultora Accenture. “Por aciu de la tecnoloxía qu'utilicen sábese perfectamente quién ye'l propietariu, quien tien la pieza que ye esclusiva, el problema d'esti mercáu ye que la regulación en términos de propiedá intelectual nun ta tan clara”, señala. Los inversores más profesionales tienen les sos reserves. Mentanto, les webs nes que se vienden estes pieces de diseñu dixital baten récords día tres día.

D'un xeitu prácticu, Rubén Vilela esplica que se trata de “activos dixitales que nun pueden consumise (sumir) nin sustituyise. Rexístrense por aciu d'un contratu intelixente (el “blockchain”) que-yos asigna un númberu únicu, lo qu'aporta tranquilidá al so propietariu frente a posibles répliques”. Y Díez axunta: “A la fin, l'últimu que ta asumiendo riesgu na operación ye l'inversor”.

Ye, a lo menos, interesante dar un voléu per estes nueves galeríes d'arte virtual. “Hai NFT de Messi, de Bruce Llee y casi de cualquier celebridá, dalgunos pueden algamar precios de cientos de miles d'euros”, recalca Vilela. Ún d'estos cromos virtuales cola imaxe d'un gran dragón nun paraxe neváu, por casu, cotizábase esti día nuna d'estes páxines de puya por un preciu superior a los 90.000 euros.

Interior de la galería Superchief coles sos obres en NFT, la primera n'amosar estes obres dixitales.

Nun son namás los diseñadores los que vieron un bon xacimientu pa facer negociu colos NFT, tamién grandes compañíes tán abrazando esta nueva tecnoloxía. Fai solo unos díes, por exemplu, Vodafone sacó a puya'l primer mensaxe de testu (SMS) de la curtia hestoria de la telefonía móvil que se vendió por más de cien mil euros. Solo dicía un curtiu: “Merry Christmas” (Feliz Navidá). La compañía de telecomunicaciones acabó donando'l dineru. Nada se sabe del inversor qu'agora tien guardáu nel so ordenador esti primera SMS de la hestoria y el certificáu qu'acredita que ye verdaderu y únicu. Pero d'equí p'arriba va poder abrir l'archivu y contemplalu cuando quiera. Daniel Díez, que ta asesorando a delles compañíes sobre l'usu d'esta tecnoloxía, asegura qu'hai inclusive equipos de fútbol españoles que se tán intentando aprovechar d'esta nueva moda inversora. Anque les sos previsiones pasen porque llegue un momentu nel que'l mercáu "normalíce". Esto supon qu'haya una especie de purga y solo queden de pies aquelles pieces de mayor calidá y que puedan aportar más valor añedíu a los inversores. “Tán en puxanza porque tán xuníos a la moda de les cadenes de bloques de les criptomonedas”, fae Vilela. Anque reconoz que “yá hai grandes grupos de la banca bien reconocíos qu'empiecen a acoyer estos nuevos activos”. Endagora, munchos creadores tán aprovechando la fola. Tanto qu'en marzu del añu pasáu vendióse la qu'hasta agora ye la pieza más cara d'esta fornada d'inversiones. Foi desarrollada por Mike Winkelman (llamáu Beeple) que la tituló “Everydays: The first 5.000 days” (Caldía: los primeros cinco mil díes), yera una especie de mosaicu de pequenos cuadros pol qu'un inversor pagó 69 millones.