Suscríbete

La Nueva España

Contenido exclusivo para suscriptores digitales

Valle Roso estrena un discu qu'inclúi una tema basada en versos del poeta Alfonso Camín

La llangreana presenta'l so nuevu trabayu güei sábadu na Llaboral

Marisa Valle Roso en Xagó, nel so nuevu clip.

La cantante llangreana Marisa Valle Roso va estrenar en directu'l so nuevu discu (“Lo fugaz”) nel conciertu que va ufiertar güei sábadu, día 15, nel teatru de la Llaboral de Xixón. Un día enantes, los diez temes que lu componen yá se pueden escuchar dafechu en toles plataformes dixitales. Ye un trabayu mui personal nel que da suelta a la so faceta como compositora y onde, en delles temes, da-yos una vuelta completa, dende'l ciñu y la conocencia, y con toques electrónicos a la tonada, el xéneru onde debutó. Asina lo demuestra nel cantar denomináu “Tonada” y n'otra de les sorpreses del nuevu trabayu, el que lleva por títulu “La luna vieja”, onde la llangreana pon música y voz a un poema d'Alfonso Camín basándose nún de los estilos de la tonada. Yá nel so anterior discu (“Consciente”), Valle Roso apurría la so versión de “Macorina”, el clásicu de Chavela Vargas con lletra d'otru poema del autor conocíu como “El poeta d'Asturies”.

Marisa Valle Roso cantando, con un paisaxe cabraliegu al fondu.

Amás de los singles que yá salieron como adelantu, el conciertu de la Llaboral va sirvir pa estrenar otros cantares, como “No era el blanco”, “que ye un emotivu valse interpretáu dende'l dolor de quien se siente traicionáu”; “Compañeras”, “un berru feminista que convida a siguir lluchando, tou ello dende'l folclore”, y “Un secreto”, que fala “d'un fechu rellacionáu cola memoria histórica d'Asturies”. Mientres llegaba'l conciertu, como aperitivu Valle Roso publicó'l vídeu de la so tema “Descalza en el camino”, que ta rodáu na sablera de Xagó. Los vídeos de la llangreana aprovechen pa vender el paisaxe d'Asturies, tamién como una seña d'identidá. Yá nel so spot promocional apaecía cantando nos montes de Cabrales. 

“Lo fugaz” ye un discu con voz femenina y reivindicación feminista. La banda que va acompañar esti sábadu a Valle Roso na Llaboral ta compuesta na so inmensa mayoría por muyeres. Ellí va tar Diana Erenas (voz, acústica y teclaos), Xerach Peñate (voz, batería, loops y programaciones) y Saray Sáez (voz, percusión, loops y programaciones). Tamién va xubir al escenariu Charlie Bautista (voz, guitarra eléctrica y teclaos), qu'amás ye'l productor del nuevu LP. “Ye un discu que parte, no referente a les lletres, de munches congoxes y esmoliciones como muyer. Lo que quiero tresmitir tien voz de muyer y elles faen qu'esa voz suene muncho más fuerte”, esplica la intérprete llangreana. “Hai munchos coros y harmonizaciones, voces que-y dan sentíu al conceutu del discu y que tienen que tar nel directu. Nun van tocar namás, van cantar xuniendo les sos voces a la mía como compañeres, faciendo música pa un mesmu fin”, axunta.

Compartir el artículo

stats