El llamáu “valor de referencia de mercáu”, procedimientu utilizáu dende esti añu pola Alministración tributaria autonómica pa tasar viviendes y otros inmuebles a efectos del cobru de dellos impuestos (Tresmisiones y Sucesiones, sobremanera), puede alzar la factura fiscal de compradores o herederos, como dexa ver ún de los primeros casos denunciaos pol sector inmobiliariu asturianu: un xixonés que pagó 130.000 euros por un pisu tendrá de tributar como si'l preciu fueren 153.000 (base imponible del impuestu de tresmisiones determinada al traviés del valor de referencia qu'ellabora'l Catastru con datos d'otres compraventes de recién). 

El riesgu de xubida fiscal, acolumbren los espertos, ye potencialmente mayor nos centros urbanos y medra pol fechu de que los nuevos valores, encontaos na información del mercáu que recueyen los notarios, pasen per alto cuestiones como'l grau de caltenimientu de la vivienda o la so accesibilidá, más allá de la información de la que dispon el Catastru. 

La posibilidá de sufrir un “impuestazu” esiste por ello tamién cuando la vivienda que se merca o herieda tien un valor efectivu de mercáu mui modestu. La siguiente hipótesis ta basada en datos oficiales y tamién n'opiniones espertes del negociu inmobiliariu:

Primer vivienda. Conforme al nuevu sistema, una antigua vivienda obrera (colomina) asitiada en Mieres, con unos 60 metros cuadraos, rehabilitada y allugada na primer planta d'un edificiu ensin ascensor apaez valorada en 30.428 euros, cantidá que s'avera al preciu real qu'un vendedor puede llograr nes referíes condiciones. La factura del impuestu de tresmisiones patrimoniales a pagar al Principáu sería nesti casu de 2.434 euros, con un tipu de gravame del 8%.

Segunda vivienda. Nel mesmu bloque ensin ascensor, otra colomina con superficie y distribución casi idéntiques, anque ensin remocicar dende va delles décades y allugada na cuarta planta, tien pal Catastru'l mesmu valor de mercáu a efectos tributarios: 30.428 euros. Les fontes consultaes nel sector inmobiliariu local indiquen que vivienda tala raramente podría vendese por más de 15.000 euros. Pero, d'asoceder asina efectivamente, el comprador quedaría obligáu a tributar como si pagara'l doble. El Principáu esixiría-y los mesmos 2.434 euros que nel exemplu de la casa en meyor estáu y más accesible. 

¿Por qué'l recaudador nun acepta ensin más el preciu escrituráu de la compraventa como base imponible del impuestu de tresmisiones? L'Alministración tiende a dotase de mecanismos oxetivos de control, nesti casu de los valores inmobiliarios, pa evitar fraudes y caltener los ingresos que paguen los servicios públicos. Arrequexáu a estes altures l'antiguu usu cotidianu del “dineru B” nes compraventes de viviendes, una corriente d'hacendistes considera que tributar sobre'l valor escrituráu ante los fedatarios públicos sería razonable y aforraría munchos de los costos de pleitos soportaos por Alministración y ciudadanos por cuenta de les imperfecciones y inequidaes de métodos de comprobación anteriores. Costos y pleitos que, albídrase, van volver col nuevu sistema.