El plan pa recuperar parte de la muralla medieval d'Avilés que se creía perdida inclúi la construcción d'un aparcamientu soterrañu con capacidá pa 93 vehículos, de dellos edificios que sumen 55 viviendes y d'una plaza que va ser al empar una especie de xardín arqueolóxicu, porque cuéntase que tenga zones verdes dende les que se va poder contemplar parte d'esos escatafinos. Estes son les pieces principales del estudiu de detalle del plan de La Muralla-Las Alas, que s'alcuentra na fase d'esposición pública, en teniendo solicitao'l Conceyu l'entamu de la evaluación ambiental estratéxica al Principáu. 

Esti proyectu forma parte del Plan Especial de Reforma y Meyora Interior del Cascu Históricu d'Avilés (PEMRICH) y el so desenvolvimientu va dexar non solo recuperar tramos del recintu cercáu, sinón tamién maquillar una zona del corazón de la ciudá qu'entá presenta una imaxe degradada, como ye la que toma tola zona ente les cais de Las Alas y del Muelle.

Pa devolver a la ciudá'l sector nordeste de la muralla, na esquina ente la cai del mesmu nome y la del Muelle, propónense delles actuaciones, ente elles el valtamientu “siquier parcial” del edificiu asitiáu nel númberu 40 de la cai de La Muralla (qu'agora tapa la capiya de Las Alas), la demolición de los númberos 42, 44 y 46 (tres los que s'escuende la fortificación) y la construcción d'un nuevu edificiu. El gobiernu cavilga destinalu a centru d'interpretación de la muralla y va ser amás la puerta a un nuevu pasu piatonal que va arrodiar l'ábside de la ilesia de San Antonio de Padua y la capiya de Las Alas. 

Tamién pretende recuperase otru tramu de muralla que se caltien de pies na cara interior de les viviendes asitiaes nos númberos 2, 4 y 6 de la cai del Muelle. El llenzu mide 40,48 metros de llargor y ente 3 y 3,5 d'altor. Ye ehí onde los arqueólogos afayaron el paséu de ronda de los soldaos. 

Esa parte de la fortificación va ser visible dende la plaza que se va habilitar nesi sitiu sobre un aparcamientu soterrañu al que se va aportar dende la cai de Xovellanos y pal que se propón en superficie una cubierta vexetal. El plan municipal pasa porque tenga 93 places, pa les viviendes que se van construyir na zona y tamién pa usu públicu. Hai que dicir, sicasí, que lo que va ocupar finalmente'l parking va quedar llindao polos resultaos de los estudios arqueolóxicos previos al estudiu de detalle. Y ye que'l respetu de los restos arqueolóxicos alredor de la muralla van marcar el so desenvolvimientu. 

En cuando a les edificaciones, na mazana ente Xovellanos y Las Alas, va siguir de pies el de la Fundación Metal. Van valtase l'antigua residencia de l'Autoridá Portuaria y l'edificiu industrial anexu, los númberos 5 y 7 de la cai Xovellanos y del edificiu conocíu como “El Moclín” namás se cuenta caltener la portalada. 

Nestos terrenes lliberaos proxéctase construyir dellos edificios de viviendes d'un máximu de trés altores que van permitir sacar al mercáu 55 pisos. Nel que se plantega pa los númberos 5 y 7 de Xovellanos habilitaráse un pasu escontra la plaza que se va xenerar nel interior de la mazana. 

Les previsiones municipales pasen por tener llistu y aprobáu l'estudiu de detalle primero de que remate l'añu. Nun va ser hasta 2023, y eso nel meyor de los casos, cuando pueda empezar esta actuación que va devolver a la ciudá parte del so recintu cercáu.